وسى كۇنى، 29 ساۋىردە، قازاقستاننىڭ عىلىمىندا، مادەنيەتى مەن ساياساتىندا ءىز قالدىرعان بىرنەشە تانىمال تۇلعا دۇنيەگە كەلگەن، دەپ حابارلايدى infohub.kz سايتى.
تولەگەن ءابدىساعي ۇلى قوجامقۇلوۆ (1946) – كۆانتتىق ءورىس تەورياسى سالاسىنىڭ مامانى، كۆانتتىق حروموديناميكادا جاڭا عىلىمي باعىتتىڭ نەگىزىن قالاۋشى كورنەكتى فيزيك-تەورەتيك. قازاقستاننىڭ ەڭبەك سىڭىرگەن عىلىم جانە تەحنيكا قايراتكەرى، ءال-فارابي اتىنداعى مەملەكەتتىك سىيلىقتىڭ لاۋرەاتى. الماتى وبلىسىندا دۇنيەگە كەلگەن، س.م. كيروۆ اتىنداعى قازاق مەملەكەتتىك ۋنيۆەرسيتەتىنىڭ فيزيكا فاكۋلتەتىن جانە سانكت-پەتەربۋرگتەگى ا.ف. يوففە اتىنداعى فيزيكا-تەحنيكالىق ينستيتۋتىنىڭ اسپيرانتۋراسىن بىتىرگەن. 1970-1998 جىلدارى قازمۋ-دا اسسيستەنت، اعا وقىتۋشى، دوسەنت، پروفەسسور، تەوريالىق فيزيكا كافەدراسىنىڭ مەڭگەرۋشىسى، فاكۋلتەت دەكانى، ەكسپەريمەنتتىك جانە تەوريالىق فيزيكا عىلىمي-زەرتتەۋ ينستيتۋتىنىڭ ديرەكتورى بولىپ جۇمىس ىستەگەن. 1998-2001 جىلدارى جەتىسۋ مەملەكەتتىك ۋنيۆەرسيتەتىنىڭ، 2001-2008 جىلدارى ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى، 2005-2012 جىلدارى قازاقستان ۇلتتىق عىلىم اكادەمياسىنىڭ ۆيسە-پرەزيدەنتى قىزمەتتەرىن اتقارعان. «ءورىس تەورياسىنداعى ستوحاستيكالىق كۆانتتاۋ» باعىتىنداعى ءبىرىنشى بولىپ سانالاتىن ءۇش مونوگرافيانىڭ اۆتورى. لانداۋ مەن ءليفشيستىڭ توعىز تومدىق تەوريالىق فيزيكا كۋرسىن يگەرگەن العاشقى جانە جالعىز قازاقستاندىق. قازاقستان جوعارى مەكتەبىنىڭ عىلىم اكادەمياسىن قۇرۋدىڭ باستاماشىلارىنىڭ ءبىرى.
ۇلىقبەك ەسداۋلەتوۆ (1954) – تۇركسويعا قاراستى تۇركى مەملەكەتتەرى جازۋشىلار وداعىنىڭ ءتوراعاسى. شىعىس قازاقستان وبلىسىندا دۇنيەگە كەلگەن، قازمۋ-دىڭ جۋرناليستيكا فاكۋلتەتىن جانە م. گوركي اتىنداعى ادەبيەت ينستيتۋتىنىڭ جوعارى ادەبيەت كۋرستارىن بىتىرگەن. «قازاقستان پيونەرى» گازەتىندە كوررەكتور، ءبولىم مەڭگەرۋشىسى، «جازۋشى» باسپاسىندا رەداكتور، قازاق تەلەديدارىنىڭ جاستار رەداكسياسىنىڭ رەداكتورى، «قازاق ادەبيەتى» گازەتىنىڭ ءتىلشىسى، قازاقستان جازۋشىلار وداعى باسقارماسىنىڭ حاتشىسى، «جاس قازاق» جانە «قازاق ادەبيەتى» گازەتتەرىنىڭ باس رەداكتورى، سىرتقى ىستەر مينيسترلىگى مەن مادەنيەت مينيسترلىگىندە ءبولىم مەڭگەرۋشىسى، «جۇلدىز» جۋرنالىنىڭ باس رەداكتورى، 2018-2023 جىلدارى قازاقستان جازۋشىلار وداعى باسقارماسىنىڭ ءتوراعاسى قىزمەتتەرىن اتقارعان. «سەمەي-نەۆادا» يادرولىق قارسى قوزعالىسىنىڭ «زامان-اي» ءانىنىڭ ءماتىنىنىڭ اۆتورى جانە تانىمال اندەردىڭ اۆتورى. ولەڭدەرى ورىس جانە باسقا تىلدەرگە اۋدارىلعان.
راۋشان بىرگەباي قىزى سارسەمباەۆا (1956) – قازاقستان ىسكەر ايەلدەر قاۋىمداستىعىنىڭ پرەزيدەنتى. الماتىدا دۇنيەگە كەلگەن، الماتى حالىق شارۋاشىلىعى ينستيتۋتىن ەكونوميست ماماندىعى بويىنشا بىتىرگەن. ينجەنەر-ەكونوميست، ستاجەر-زەرتتەۋشى، اسپيرانت، قازاق كسر مەملەكەتتىك ستاتيستيكا كوميتەتى جانىنداعى بىلىكتىلىكتى ارتتىرۋ ينستيتۋتىنىڭ ديرەكتورىنىڭ ورىنباسارى، «راۋشان» اق باس ديرەكتورى بولىپ جۇمىس ىستەگەن. قازىرگى قىزمەتىندە 1995 جىلدان بەرى.
نۇرتورە بايتلەس ۇلى ءجۇسىپ (1961) – قازاقستان پارلامەنتى سەناتىنىڭ دەپۋتاتى، الەۋمەتتىك-مادەني دامۋ جانە عىلىم كوميتەتىنىڭ ءتوراعاسى. قىزىلوردا وبلىسىنىڭ تۋماسى، ءال-فارابي اتىنداعى قازاق ۇلتتىق ۋنيۆەرسيتەتىن بىتىرگەن. پاۆلودار وبلىستىق « قىزىل تۋ» گازەتىندە ءتىلشى، ءبولىم مەڭگەرۋشىسى، باس رەداكتوردىڭ ورىنباسارى، «ەگەمەن قازاقستان» گازەتىندە ەكونوميكا ءبولىمىنىڭ مەڭگەرۋشىسى جانە باس رەداكتوردىڭ ورىنباسارى، «جاس الاش»، «اق جول قازاقستان» گازەتتەرىنىڭ باس رەداكتورى، «ەگەمەن قازاقستان» رەسپۋبليكالىق گازەتى» اق باس ديرەكتورى، «استانا حابارى» جانە «AIQYN» باس رەداكتورى، سەنات دەپۋتاتى (2019-2022) قىزمەتتەرىن اتقارعان. قازىرگى قىزمەتىندە 2022 جىلعى جەلتوقساننان بەرى.
نۇرلان بايانعالي ۇلى ءالىمجانوۆ (1984) – قازاق اكتەرى، ءانشى، سازگەر، تەلەجۇرگىزۋشى، قازاقستاننىڭ ەڭبەك سىڭىرگەن قايراتكەرى. الماتىدا دۇنيەگە كەلگەن، ت.ق. جۇرگەنوۆ اتىنداعى قازاق ۇلتتىق ونەر اكادەمياسىن بىتىرگەن. مۇحتار اۋەزوۆ اتىنداعى مەملەكەتتىك اكادەميالىق تەاتردا، «قازاقفيلم»، «پاڭ نۇرماعانبەت»، «Satai Film» كينوستۋديالارىندا، «حابار» اگەنتتىگىندە اكتەر بولىپ جۇمىس ىستەگەن، VI شاقىرىلىم پارلامەنت ءماجىلىسىنىڭ دەپۋتاتى، نۇر-سۇلتان قالاسى مادەنيەت باسقارماسىنىڭ باسشىسى بولعان. «كوشباسشى جولى» كينوەپوپەياسىندا نۇرسۇلتان نازارباەۆتىڭ ءرولى وعان ۇلكەن تانىمالدىق اكەلدى.
انۋار قانات ۇلى جانعوزين (1986) – «نازاربايەۆ زياتكەرلىك مەكتەپتەرى» دببۇ باسقارما ءتوراعاسى. قاراعاندىدا دۇنيەگە كەلگەن، لومونوسوۆ اتىنداعى ممۋ جانە «نازاربايەۆ ۋنيۆەرسيتەتىن» بىتىرگەن. «نازاربايەۆ زياتكەرلىك مەكتەپتەرى» دببۇ-دا مەنەدجەر، دەپارتامەنت ديرەكتورى، ماتەماتيكا ءپانىنىڭ ءمۇعالىمى، استانادا مەكتەپ ديرەكتورى، استانا قالاسى ءبىلىم باسقارماسىنىڭ باسشىسى، «حالىقارالىق باعدارلامالار ورتالىعى» اق باسقارما ءتوراعاسى بولىپ جۇمىس ىستەگەن. قازىرگى قىزمەتىندە 2023 جىلعى ناۋرىزدان بەرى.
نۇرلان تالعات ۇلى نۇرعابىلوۆ (1988) – الماتى قالاسى جەر قاتىناستارى باسقارماسىنىڭ باسشىسى. الماتى وبلىسى ۇشتوبە قالاسىندا دۇنيەگە كەلگەن، قازاق مەملەكەتتىك زاڭ اكادەمياسىن، ءال-فارابي اتىنداعى قازۇۋ جانە University of Dundee-نى بىتىرگەن. بانكتەردە باسقارۋشى ديرەكتور، جوبا جەتەكشىسى، كونسالتينگتىك كومپانيالاردا قىزمەت اتقارعان. قازىرگى قىزمەتىندە 2023 جىلعى ساۋىردەن بەرى.
سونداي-اق وسى كۇنى احمەت قۋان ۇلى جۇبانوۆ (1906-1968) – كومپوزيتور، مۋزىكانت، ەتنوگراف، ديريجەر، قازاقستان عىلىم اكادەمياسىنىڭ اكادەميگى، قازاقستاننىڭ حالىق ءارتىسى دۇنيەگە كەلگەن. اقتوبە وبلىسىنىڭ تۋماسى، لەنينگراد مۋزىكالىق تەحنيكۋمى مەن كونسەرۆاتورياسىندا وقىعان. دومبىراشىلار ءانسامبلىن ۇيىمداستىرىپ، ونىڭ نەگىزىندە قۇرمانعازى اتىنداعى قازاق حالىق اسپاپتار وركەسترى قۇرىلعان. قازاق فيلارمونياسىنىڭ كوركەمدىك جەتەكشىسى، الماتى كونسەرۆاتورياسىنىڭ رەكتورى، ادەبيەت جانە ونەر ينستيتۋتىندا كافەدرا مەڭگەرۋشىسى جانە مۋزىكا ءبولىمىنىڭ باسشىسى بولىپ جۇمىس ىستەگەن. قازاق مۋزىكاسى تۋرالى عىلىمي ەڭبەكتەردىڭ اۆتورى، قازاقستاننىڭ كاسىبي مۋزىكا ونەرىنىڭ نەگىزىن سالۋشىلاردىڭ ءبىرى. لەنين وردەنىمەن ماراپاتتالعان، الماتىدا مۋزىكالىق مەكتەپ-ينتەرنات پەن كوشە ونىڭ ەسىمىمەن اتالادى.