4،3 ملن تەڭگە – ءدال وسى سوما «ۇزدىك پەداگوگ» اتاعىن العان ۇستازعا بەرىلەدى. سىياقى مولشەرى مەن تولەم ءتارتىبىن ۇكىمەت بەلگىلەيدى، ال سىياقىنىڭ ءوزى 1000 ەسەلەنگەن اەك-تى قۇرايدى. بۇل تۋرالى infohub.kz حابارلايدى.
قازاقستان رەسپۋبليكاسى وقۋ-اعارتۋ مينيسترلىگىنىڭ ناقتىلاۋىنشا، 2023 جىلدان باستاپ حالىقارالىق وليمپيادالار، بايقاۋلار مەن سپورت جارىستارىنىڭ جەڭىمپازدارى مەن جۇلدەگەرلەرىن دايىنداعان پەداگوگتارعا ءۇش ايلىق جالاقى مولشەرىندە ءبىرجولعى سىياقى تولەنەدى.
ۆەدومستۆو مالىمەتىنشە، «قازاقستاننىڭ ەڭبەك سىڭىرگەن ۇستازى» قۇرمەتتى اتاعىنا 97 پەداگوگ يە بولعان، ال «ۇزدىك پەداگوگ» رەسپۋبليكالىق بايقاۋىنىڭ جەڭىمپازدارى 800-دەن استام ءمۇعالىم بولدى. «ءبىلىم سالاسىنداعى وزگەرىستەردىڭ 1000 كوشباسشىسى» جوباسى اياسىندا 2023-2026 جىلدار ارالىعىندا كادرلىق رەزەرۆكە 983 پەداگوگ ەنگىزىلدى. سونىمەن قاتار، قازاقستاندا بەس پەداگوگقا ءبىلىم سالاسىنداعى ەڭ جوعارى مەملەكەتتىك اتاق – «ەڭبەك ەرى» بەرىلدى.
بۇعان دەيىن قازاقستاننىڭ ۇزدىك ءمۇعالىمى ءتورت ميلليون تەڭگەگە جۋىق سىياقى الاتىنى حابارلانعان بولاتىن.