بۇگىن سەمەي قالاسىندا «EcoForest» تولىق سيكلدى ەكولوگيالىق اعاش وڭدەۋ ونەركاسىپتىك پاركىنىڭ ىرگەتاسىن قالاۋ ءراسىمى ءوتتى، دەپ حابارلايدى infohub.kz سايتى. سالتاناتتى شاراعا اباي وبلىسىنىڭ اكىمى بەرىك ءۋالي مەن «Xinjiang Chunzheng Aosi Trading Co.، Ltd.» كومپانياسىنىڭ باس ديرەكتورى چجان ليكاي قاتىستى.
وبلىس اكىمى قۇتتىقتاۋ سوزىندە بۇل جوبا ءوڭىردىڭ ونەركاسىپتىك ءارى ينۆەستيسيالىق الەۋەتىن ارتتىرىپ، جاڭا جۇمىس ورىندارىن اشاتىنىن اتاپ ءوتتى. «مەملەكەت باسشىسى قاسىم-جومارت كەمەل ۇلى توقايەۆ ينۆەستيسيا تارتۋدى ەكونوميكالىق ساياساتتىڭ باسىم باعىتتارىنىڭ ءبىرى رەتىندە ۇنەمى ايتىپ كەلەدى. اباي وبلىسىندا ينۆەستورلارعا قولايلى جاعداي جاساۋعا، وندىرىستىك ينفراقۇرىلىمدى دامىتۋعا ەرەكشە كوڭىل بولىنۋدە. بۇگىنگى جوبا – حالىقارالىق سەرىكتەستىكتىڭ ناقتى ناتيجەسى. بىلتىر قىتايدا وتكەن «ۇلكەن التاي» كونفەرەنسياسىندا باستالعان كەلىسسوزدەردىڭ ارقاسىندا بۇل باستاما جۇزەگە اسىپ وتىر. جوبا وڭىرلىك ۇيلەستىرۋ كەڭەسىندە قولداۋ تاۋىپ، قاجەتتى مەملەكەتتىك قولداۋ شارالارى كورسەتىلىپ، جەر ۋچاسكەلەرى بەرىلدى. بۇل ءوڭىردىڭ ونەركاسىپتىك جانە ەكولوگيالىق دامۋىنا ەلەۋلى ۇلەس قوسىپ، زاماناۋي تەحنولوگيالار ەنگىزۋگە، اعاش شيكىزاتىن قالدىقسىز پايدالانۋعا مۇمكىندىك بەرەدى»، – دەدى بەرىك ءۋالي.
جوبا ورتتەن زارداپ شەككەن جانە سانيتارلىق كەسۋگە جاتاتىن اعاشتى ءتيىمدى وڭدەۋگە، قوسىلعان قۇنى جوعارى ءونىم شىعارۋعا، ءوندىرىس قالدىقتارىن قايتا پايدالانۋعا باعىتتالعان. جالپى ينۆەستيسيا كولەمى 67 ميلليون اقش دوللارى. سەمەيدە 50 گەكتار اۋماقتا تولىق سيكلدى يندۋستريالىق-ەكولوگيالىق اعاش وڭدەۋ پاركى، ال بورودۋليحا اۋدانىنداعى ميحايلوۆكا اۋىلىندا 4 گەكتار جەردە اعاشتى باستاپقى وڭدەۋ كەشەنى سالىنادى.
سەمەيدەگى كەشەندە جىلىنا 2 ميلليون تەكشە مەترگە دەيىن اعاش شيكىزاتى وڭدەلىپ، 800–900 مىڭ تەكشە مەتر دايىن ءونىم شىعارىلادى. كەشەن قۇرامىنا جىلىنا 250–300 مىڭ تەكشە مەتر قۋاتتىلىقتاعى ە0، ە1 جانە ەنف كلاستى تاقتالار زاۋىتى، ءدال سونداي قۋاتتىلىقتاعى وسب جانە فوسب تاقتالارى زاۋىتى، جىلىنا 100 مىڭ تەكشە مەترگە دەيىن دايىن ءونىم شىعاراتىن جيھاز ءمودۋلى، تەرميالىق موديفيكاسيالانعان جانە انتيسەپتيكالىق وڭدەلگەن اعاش ءوندىرىسى، ەۋروپاللەتتەر، اعاش پەللەتتەرى مەن بيووتىن زاۋىتى، ورگانيكالىق تىڭايتقىشتار زاۋىتى، قۇرىلىس-لوگيستيكالىق ورتالىق جانە ينجەنەرلىك ينفراقۇرىلىم كىرەدى. بورودۋليحاداعى كەشەندە جىلىنا 500 مىڭ تەكشە مەترگە دەيىن اعاش وڭدەلىپ، 120–150 مىڭ توننا پەللەت وندىرىلەدى. بۇل الاڭدا شيكىزاتتى قابىلداۋ، سۇرىپتاۋ، قابىعىن ارشۋ، ارالاۋ، كەپتىرۋ، ۇساقتاۋ جانە تەرەڭ وڭدەۋگە دايىنداۋ جۇرگىزىلىپ، دايىندالعان اعاش سەمەيگە جىبەرىلەدى.
جوبا اياسىندا زاماناۋي اۆتوماتتاندىرىلعان ءوندىرىس ىسكە قوسىلىپ، اعاش شيكىزاتى قالدىقسىز تەحنولوگيامەن تەرەڭ وڭدەلەدى. كاسىپورىنداردا وسب جانە فوسب پانەلدەرى، مدف، اعاش-جاڭقالى تاقتالار، فانەرا، شپون، ينجەنەرلىك پانەلدەر، جيھاز دايىندامالارى، اعاش پەللەتتەرى، بيووتىن جانە ورگانيكالىق تىڭايتقىشتار وندىرىلەدى. تولىق قۋاتىنا شىققاندا 900-گە جۋىق تۇراقتى جۇمىس ورنى اشىلىپ، ءونىم قازاقستان نارىعىمەن قاتار ورتالىق ازيا، ەۋروپا، جاپونيا، وڭتۇستىك كورەيا جانە باسقا حالىقارالىق نارىقتارعا ەكسپورتتالادى.