اباي وبلىسىندا 30 جاستاعى ايەل بانك شوتىن ءۇشىنشى تۇلعالارعا بەرگەنى ءۇشىن — ياعني دروپپەرلىك جاساعانى ءۇشىن سوت الدىندا جاۋاپ بەردى. شوتقا قول جەتكىزگەنى ءۇشىن ول 40 مىڭ تەڭگە العان، الايدا سوڭىندا مەملەكەتكە ودان الدەقايدا كوپ تولەۋگە ءماجبۇر بولدى، دەپ حابارلايدى infohub.kz سايتى.
ىشكى ىستەر مينيسترلىگىنىڭ اقپاراتتىق مەدياپورتالىنىڭ مالىمەتىنشە، 1 ناۋرىزدا كوكپەكتى اۋدانىندا 30 جاستاعى ايەل Instagram جەلىسىندە بانك شوتىن جالعا بەرۋ ارقىلى اقشا تابۋ مۇمكىندىگى تۋرالى حابارلاندىرۋدى كورگەن. ۇسىنىسقا قىزىعىپ، ول حابارلاندىرۋداعى سىلتەمە ارقىلى Telegram-عا وتكەن.
وندا ونىمەن بەلگىسىز ءبىر ادام بايلانىسقان. حات الماسۋ بارىسىندا وعان اقشا اۋدارىمدارىن جۇزەگە اسىرۋ ءۇشىن ءوز بانك شوتىن ءۇشىنشى تۇلعالاردىڭ پايدالانۋىنا بەرۋدى ۇسىنعان. ول ءۇشىن اقشالاي سىياقى ۋادە ەتىلگەن.
ايەل كۇماندى وپەراسيالارعا قاتىسۋدان باس تارتا الاتىنىنا قاراماستان، ۇسىنىسقا كەلىسىپ، بانك شوتىن ءۇشىنشى تۇلعالاردىڭ پايدالانۋىنا بەرگەن. 2026 جىلعى 2-9 ناۋرىز ارالىعىندا ونىڭ بانك شوتىنا ءارتۇرلى ادامداردان اقشا ءتۇسىپ وتىرعان. بانك شوتىن پايدالانۋعا بەرگەنى ءۇشىن ايەل 40 مىڭ تەڭگە سىياقى العان.
سوتقا دەيىنگى تەرگەۋ ناتيجەلەرى بويىنشا كوكپەكتى اۋدانىنىڭ تەرگەۋ ءبولىمىنىڭ تەرگەۋشىسى قىلمىستىق ءىستى سوتتىڭ قاراۋىنا جىبەرگەن. سوت ونىڭ ارەكەتتەرىن قازاقستان رەسپۋبليكاسى قىلمىستىق كودەكسىنىڭ بانك شوتىنا، تولەم قۇرالىنا نەمەسە سايكەستەندىرۋ قۇرالىنا زاڭسىز قول جەتكىزۋدى بەرۋ، بەرۋ جانە الۋ، سونداي-اق تولەمدەردى جانە (نەمەسە) اقشا اۋدارىمدارىن زاڭسىز جۇزەگە اسىرۋ ءۇشىن جاۋاپكەرشىلىكتى كوزدەيتىن نورماسى بويىنشا سارالاعان.
جازا تاعايىنداۋ كەزىندە سوت كىنانى تولىق مويىنداۋ، جاساعان ىسىنە شىن جۇرەكتەن وكىنۋ، سونداي-اق كامەلەتكە تولماعان بالالارىنىڭ اسىراۋىندا بولۋىن جەڭىلدەتەتىن ءمان-جايلار رەتىندە ەسكەرگەن. وسىنى ەسكەرە وتىرىپ، وعان 20 ايلىق ەسەپتىك كورسەتكىش مولشەرىندە، ياعني 86 500 تەڭگە ايىپپۇل تۇرىندەگى جازا تاعايىندالعان.
سونىمەن قاتار، ودان جابىرلەنۋشىلەرگە وتەماقى قورىنا 5 ايلىق ەسەپتىك كورسەتكىش (21 625 تەڭگە) مولشەرىندە ءماجبۇرلى تولەم وندىرىلگەن.