جارما اۋداندىق سوتىندا جەرگىلىكتى تۇرعىننىڭ ءوز تانىسىنىڭ ينتيم فوتوسىن تاراتقانى تۋرالى ءىس قارالدى، دەپ حابارلايدى infohub.kz سايتى.
ءباسپاسوز قىزمەتىنىڭ مالىمەتىنشە، ەر ادام بۇرىنعى تانىسىنىڭ ۇيالى تەلەفونىن تاۋىپ العان. ونى زاڭدى يەسىنە قايتارماي، تەلەفونعا كىرىپ، 67 فوتوسۋرەتتى ءوز تەلەفونىنا كوشىرىپ العان. بۇل سۋرەتتەردە جابىرلەنۋشى جالاڭاش نەمەسە ىشكيىممەن تۇسكەن. سونداي-اق، ول جابىرلەنۋشىنىڭ جەكە حات-حابارلارىمەن تانىسقان.
«ول قىزعانىشتان جابىرلەنۋشىنىڭ ەكى تانىسىنا ونىڭ كەلىسىمىنسىز اتالعان فوتوسۋرەتتەردى جىبەرىپ، جەكە ءومىرىنىڭ قۇپياسىن قۇرايتىن مالىمەتتەردى تاراتقان»، — دەلىنگەن سوت حابارلاماسىندا.
سوتتا ول كىناسىن تولىق مويىنداپ، ىستەگەنىنە وكىنگەن. سونىمەن قاتار، تاراپتار تاتۋلاسىپ، جابىرلەنۋشى ەر ادامدى كەشىرگەنىن جانە باس بوستاندىعىنان ايىرۋمەن بايلانىستى ەمەس جازا تاعايىنداۋدى سۇراعانىن مالىمدەگەن.
ەر ادام كىنالى دەپ تانىلىپ، 3 جىلعا شارتتى تۇردە باس بوستاندىعىنان ايىرۋ جازاسى تاعايىندالدى.