اباي وبلىسىندا ءۇش جاڭارتىلعان تەمىرجول ۆوكزالى پايدالانۋعا بەرىلدى، دەپ حابارلايدى infohub.kz سايتى.
مەملەكەت باسشىسى قاسىم-جومارت توقاەۆتىڭ تاپسىرماسىنا جانە «قازاقستان تەمىر جولى» ۇلتتىق كومپانياسىنىڭ ۆوكزال ينفراقۇرىلىمىن جاڭعىرتۋ باعدارلاماسىنا سايكەس ەلىمىزدە 124 ۆوكزالدى جاڭارتۋ باستالدى، ونىڭ ىشىندە اباي وبلىسىندا 10 ۆوكزال بار. بۇگىن جارما اۋدانىنداعى ۇشبيىك، جارما جانە شار ستانسيالارىندا جاڭارتىلعان ۆوكزالدار اشىلدى. سالتاناتتى شاراعا وبلىس اكىمى بەرىك ءۋالي قاتىستى.
جاڭعىرتۋ جۇمىستارى «قازاقستان تەمىر جولى» ۇلتتىق كومپانياسىنىڭ تاپسىرىسى بويىنشا قازاقستان رەسپۋبليكاسى ۇكىمەتىنىڭ، كولىك مينيسترلىگىنىڭ، «سامۇرىق-قازىنا» اق جانە اباي وبلىسى اكىمدىگىنىڭ قولداۋىمەن جۇرگىزىلدى.
ءوڭىر باسشىسى جاڭارتىلعان ۆوكزالداردىڭ تۇرعىندار ءۇشىن ماڭىزدىلىعىن اتاپ ءوتتى. «تەمىر جول – ەلىمىزدىڭ ەلدى مەكەندەرىن بايلانىستىراتىن ستراتەگيالىق ماڭىزى بار كولىك جۇيەلەرىنىڭ ءبىرى. سوندىقتان ونىڭ ينفراقۇرىلىمىن جاڭارتۋ جانە جولاۋشىلارعا قولايلى جاعداي جاساۋ – ۋاقىت تالابىنان تۋىنداپ وتىرعان ماڭىزدى مىندەت. مەملەكەت باسشىسى قاسىم-جومارت كەمەل ۇلى توقايەۆ ەلدىڭ كولىك-لوگيستيكالىق الەۋەتىن ارتتىرۋعا، تەمىرجول ينفراقۇرىلىمىن جاڭعىرتۋعا جانە جولاۋشىلارعا قىزمەت كورسەتۋ ساپاسىن جاقسارتۋعا ەرەكشە كوڭىل بولۋدە. ۆوكزالداردى زاماناۋي تالاپتارعا ساي جاڭارتۋ تۇرعىنداردىڭ سۇرانىسىنا جاۋاپ بەرەتىن ماڭىزدى شەشىم بولدى دەپ ەسەپتەيمىز. وسى ورايدا وبلىس تۇرعىندارى اتىنان وسى ماڭىزدى جوبالاردى جۇزەگە اسىرۋعا ۇلەس قوسقان بارلىق ازاماتتار مەن ماماندارعا شىنايى العىسىمدى بىلدىرەمىن. بۇگىن ماڭىزدى كولىك جولدارىنىڭ توعىسقان جەرىندە ورنالاسقان جارما اۋدانىندا بىردەن ءۇش جاڭا ۆوكزال اشىپ وتىرمىز. ولار جولاۋشىلارعا قولايلى جاعداي جاساپ، جارما اۋدانىنىڭ ودان ءارى دامۋىنا ىقپال ەتسىن! بارشاڭىزدى وسى ايتۋلى وقيعامەن شىن جۇرەكتەن قۇتتىقتايمىن!» – دەدى بەرىك ءۋالي.
ءۇش ستانسيا دا ءوڭىردىڭ كولىك جۇيەسىندە ەرەكشە ورىن الادى. ولار ارقىلى سەمەي – استانا، نوۆوسيبيرسك – الماتى، پاۆلودار – الماتى، سەمەي – قىزىلوردا جانە وسكەمەن – الماتى باعىتتارى بويىنشا جولاۋشىلار پويىزدارى جۇرەدى.
شار قالاسىنداعى تەمىرجول ۆوكزالى 1982 جىلى سالىنعان. جاڭعىرتۋ بارىسىندا عيماراتتىڭ جالپى اۋدانى 413 شارشى مەتردەن 654 شارشى مەترگە ۇلعايدى. ءبىر قاباتتى نىسان ەكى قاباتتى بولدى، ىشكى بولمەلەر تولىعىمەن جاڭارتىلدى. ليفت ورناتىلىپ، كۇتۋ جانە جولاۋشىلارعا قىزمەت كورسەتۋ ايماقتارى قاجەتتى جابدىقتارمەن جاراقتاندىرىلدى. سونىمەن قاتار، ۆوكزالدا بۇرىن بولماعان ۇزىندىعى 716 مەتر ارالدىق پلاتفورما سالىندى.
ۇشبيىك ستانسياسىنداعى تەمىرجول ۆوكزالى 1995 جىلى سالىنعان. نىسانعا سوڭعى كۇردەلى جوندەۋ 2012 جىلى جۇرگىزىلگەن. جاڭعىرتۋ ناتيجەسىندە عيماراتتىڭ جالپى اۋدانى 83،7 شارشى مەتردەن 201،1 شارشى مەترگە دەيىن ۇلعايدى. ىشكى بولمەلەر جاڭارتىلىپ، كۇتۋ جانە جولاۋشىلارعا قىزمەت كورسەتۋ بولمەلەرى قاجەتتى جابدىقتارمەن جاراقتاندىرىلدى.
جارما ستانسياسىنداعى ۆوكزال عيماراتى 1996 جىلى سالىنعان. تەحنيكالىق تەكسەرۋ ناتيجەلەرى بويىنشا ەسكى عيمارات تولىعىمەن بۇزىلىپ، ورنىنا جاڭا ۆوكزال سالىندى. نىساننىڭ جالپى اۋدانى 217 شارشى مەتردەن 347،7 شارشى مەترگە ۇلعايدى. ىشكى بولمەلەر قايتا جابدىقتالىپ، كۇتۋ جانە جولاۋشىلارعا قىزمەت كورسەتۋ ايماقتارى زاماناۋي تالاپتارعا سايكەستەندىرىلدى. سونداي-اق، 650 مەتر پەررون جاڭارتىلدى.
ءۇش ۆوكزالدا دا جولاۋشىلاردىڭ قاۋىپسىزدىگى مەن جايلىلىعىنا، سونداي-اق ەرەكشە قاجەتتىلىكتەرى بار ازاماتتار ءۇشىن قولجەتىمدى ورتا قۇرۋعا ەرەكشە كوڭىل ءبولىندى.