اباي وبلىسىنىڭ تۇرعىنى الەۋمەتتىك جەلىلەردە بۇرىنعى جۇمىس بەرۋشىسى جانە ونىڭ جاقىندارى تۋرالى جازعاندارى ءۇشىن بەس جىلعا بلوگەرلىك قىزمەتپەن اينالىسۋ قۇقىعىنان ايىرىلدى، دەپ حابارلايدى infohub.kz.
وڭىردەگى دۋيس ءباسپاسوز قىزمەتىنىڭ مالىمەتىنشە، 42 جاستاعى ايەل بۇرىنعى جۇمىس بەرۋشىسى مەن ونىڭ تۋىستارىنا قاتىستى جالعان اقپارات تاراتقانى جانە قورقىتقانى ءۇشىن سوتتالدى. سوت وعان ەكى جىل باس بوستاندىعىنان ايىرۋ جازاسىن كەستى، سونداي-اق بەس جىل مەرزىمگە بلوگەرلىك قىزمەتپەن اينالىسۋعا تىيىم سالدى.
ايەل جەكە ۇيىمداردىڭ بىرىندە جۇمىس ىستەگەن. ءوز ەركىمەن جۇمىستان شىققاننان كەيىن ول ناقتى جۇمىس ىستەگەن بارلىق كەزەڭ ءۇشىن جالاقىسىن الدى. وعان قاراماستان، ول اقشا تولەنبەگەنىن مالىمدەدى.
الەۋمەتتىك جەلىلەردى بەلسەندى قولدانۋشى بولا وتىرىپ، ول ءوز پاراقشاسىندا بۇرىنعى باسشىسى مەن ونىڭ جاقىندارى تۋرالى جازبالار جاريالاي باستادى. ولاردا جالعان اقپارات بولدى، جەكە قاسيەتتەرى كەلەكەلەندى جانە بۇرىنعى جۇمىس بەرۋشىنىڭ جاقىندارىنىڭ قادىر-قاسيەتىن قورلايتىن جەكە سيپاتتاعى مالىمەتتەر جاريالاندى.
سونىمەن قاتار، ول بۇرىنعى جۇمىس بەرۋشىسى مەن ونىڭ جاقىندارىنىڭ مۇددەلەرىنە ەلەۋلى زيان كەلتىرۋى مۇمكىن باسقا دا مالىمەتتەردى تاراتامىن دەپ قورقىتتى. سونىمەن بىرگە ايەل ۇندەمەگەنى ءۇشىن اقشا تولەۋدى تالاپ ەتتى.
سوتتالعان ايەلدىڭ ەكى كامەلەتكە تولماعان بالاسى (11 جانە 10 جاستا) بولۋىن ەسكەرە وتىرىپ، باس بوستاندىعىنان ايىرۋ تۇرىندەگى جازانى وتەۋ ءبىر جىلعا كەيىنگە شەگەرىلدى.
ايەل اباي وبلىسىنىڭ پروباسيا قىزمەتىنىڭ ەسەبىنە قويىلدى. ونىمەن پروفيلاكتيكالىق جانە ءتۇسىندىرۋ جۇمىستارى جۇرگىزىلۋدە. سونداي-اق وعان سوت تالاپتارى مەن ولاردى بۇزۋدىڭ سالدارى ءتۇسىندىرىلدى. جازانى وتەۋدەن جالتارعان جاعدايدا كەيىنگە شەگەرۋ جويىلۋى مۇمكىن، ال تاعايىندالعان جازا ورىندالۋعا جىبەرىلەدى.
«جازامدى الىپ، قاتە ىستەگەنىمدى ءتۇسىندىم. بالالارىمنىڭ الدىندا ۇيالدىم. ەندى جازبالارىمنىڭ كەسىرىنەن ولاردان ۇزاق ۋاقىتقا ايىرىلىپ قالۋىم مۇمكىن ەكەنىن تۇسىنەمىن. كەيىنگە شەگەرۋ ۋاقىتىندا بوستاندىقتان ايىرىلماۋ جانە ءارقاشان بالالارىم مەن جاقىندارىمنىڭ قاسىندا بولۋ ءۇشىن قولىمنان كەلگەننىڭ ءبارىن جاسايمىن. قاتەمدى ءتۇسىندىم جانە مۇنداي ارەكەتتەردىڭ اۋىر سالدارى بولۋى مۇمكىن ەكەنىن ۇعامىن»، — دەدى سوتتالعان ايەل.