ايماق باسشىسى قۇتتىقتاۋ سوزىندە بۇل جوبانىڭ ءوڭىردىڭ ونەركاسىپتىك، ينۆەستيسيالىق الەۋەتىن ارتتىرۋعا، جاڭا جۇمىس ورىندارىن اشۋعا زور ۇلەس قوساتىنىن اتاپ ءوتتى.
«مەملەكەت باسشىسى قاسىم-جومارت كەمەل ۇلى توقايەۆ ينۆەستيسيا تارتۋدى ەلىمىزدىڭ ەكونوميكالىق ساياساتىنىڭ باسىم باعىتتارىنىڭ ءبىرى رەتىندە ۇنەمى ايتىپ، ءتيىستى تاپسىرما بەرىپ كەلەدى. اباي وبلىسىندا ينۆەستورلار ءۇشىن قولايلى جاعداي جاساۋعا، وندىرىستىك ينفراقۇرىلىمدى دامىتۋعا جانە جاڭا وندىرىستەردى ىسكە قوسۋعا ەرەكشە كوڭىل ءبولىپ وتىرمىز. بۇگىنگى جوبا – حالىقارالىق سەرىكتەستىكتىڭ ناقتى ناتيجەسى. بىلتىر جۇڭگو حالىق رەسپۋبليكاسىندا وتكەن «ۇلكەن التاي» حالىقارالىق كونفەرەنسياسىندا باستالعان كەلىسسوزدەردىڭ ناتيجەسىندە بۇل باستاما جۇزەگە اسىرىلعالى وتىر. جوبا وڭىرلىك ۇيلەستىرۋ كەڭەسىندە قولداۋ تاۋىپ، ونى ىسكە اسىرۋ ءۇشىن قاجەتتى مەملەكەتتىك قولداۋ شارالارى كورسەتىلىپ، جەر ۋچاسكەلەرى بەرىلدى. جوبانىڭ ىسكە اسىرىلۋى ءوڭىردىڭ ونەركاسىپتىك جانە ەكولوگيالىق دامۋىنا ەلەۋلى ۇلەس قوسىپ، جاڭا جۇمىس ورىندارىن اشۋعا، زاماناۋي تەحنولوگيالاردى ەنگىزۋگە جانە اعاش شيكىزاتىن ءتيىمدى، كەشەندى ءارى قالدىقسىز پايدالانۋعا مۇمكىندىك بەرەدى»، – دەدى بەرىك ءۋالي.
جوبا ورتتەن زارداپ شەككەن جانە سانيتارلىق كەسۋگە جاتاتىن اعاشتى ءتيىمدى وڭدەۋگە، قوسىلعان قۇنى جوعارى ءونىم شىعارۋعا، ءوندىرىس قالدىقتارىن قايتا پايدالانۋعا جانە ءوڭىردىڭ ونەركاسىپتىك الەۋەتىن ارتتىرۋعا باعىتتالعان.
جوبانىڭ جالپى ينۆەستيسيالىق كولەمى 67 ميلليون اقش دوللارىن قۇرايدى. ونىڭ اياسىندا سەمەي قالاسىندا 50 گەكتار اۋماقتا تولىق سيكلدى يندۋستريالىق-ەكولوگيالىق اعاش وڭدەۋ پاركى، ال بورودۋليحا اۋدانىنداعى ميحايلوۆكا اۋىلىندا 4 گەكتار جەردە اعاشتى باستاپقى وڭدەۋ كەشەنى سالىنادى.
سەمەيدەگى كەشەندە جىلىنا 2 ميلليون تەكشە مەترگە دەيىن اعاش شيكىزاتىن وڭدەپ، 800–900 مىڭ تەكشە مەتر دايىن ءونىم شىعارۋ جوسپارلانعان. كەشەن قۇرامىنا جىلىنا 250–300 مىڭ تەكشە مەتر قۋاتتىلىققا يە E1، E0 جانە ENF كلاسىنداعى تاقتالار وندىرەتىن زاۋىت، جىلىنا 250–300 مىڭ تەكشە مەتر قۋاتتىلىققا يە OSB جانە FOSB تاقتالارىن وندىرەتىن زاۋىت، جىلىنا 100 مىڭ تەكشە مەترگە دەيىن دايىن ءونىم شىعاراتىن جيھاز ءوندىرىسى ءمودۋلى، تەرميالىق موديفيكاسيالانعان جانە انتيسەپتيكالىق وڭدەۋدەن وتكەن اعاش ءوندىرىسى، ەۋروپاللەتتەر ءوندىرىسى، اعاش پەللەتتەرى مەن بيووتىن وندىرەتىن زاۋىت، ورگانيكالىق تىڭايتقىشتار وندىرەتىن زاۋىت، قۇرىلىس-لوگيستيكالىق ورتالىق جانە قاجەتتى ينجەنەرلىك ينفراقۇرىلىم ەنەدى. بورودۋليحا اۋدانىنداعى كەشەندە جىلىنا 500 مىڭ تەكشە مەترگە دەيىن اعاش وڭدەۋ جانە 120–150 مىڭ توننا پەللەت ءوندىرۋ كوزدەلگەن. اتالعان الاڭدا اعاشتى قابىلداۋ، ەسەپكە الۋ جانە سۇرىپتاۋ، قابىعىن ارشۋ، سورتيمەنتتەرگە ءبولۋ، ارالاۋ، كەپتىرۋ، ۇساقتاۋ جانە شيكىزاتتى تەرەڭ وڭدەۋگە دايىنداۋ جۇمىسى جۇرگىزىلەدى. دايىندالعان اعاش سەمەي قالاسىنداعى نەگىزگى وندىرىستىك كەشەنگە جىبەرىلەدى.
جوبا اياسىندا زاماناۋي اۆتوماتتاندىرىلعان ءوندىرىس ىسكە قوسىلىپ، اعاش شيكىزاتى قالدىقسىز تەحنولوگيا بويىنشا تەرەڭ وڭدەلەدى. كاسىپورىنداردا OSB جانە FOSB پانەلدەرى، MDF، اعاش-جاڭقالى تاقتالار، فانەرا، شپون، ينجەنەرلىك جانە ارلەۋ پانەلدەرى، جيھاز دايىندامالارى، اعاش پەللەتتەرى، بيووتىن جانە ورگانيكالىق تىڭايتقىشتار وندىرىلەتىن بولادى.
تولىق قۋاتىنا شىققان كەزدە كاسىپورىنداردا 900-گە دەيىن تۇراقتى جۇمىس ورنى اشىلىپ، وندىرىلگەن ءونىم قازاقستان نارىعىمەن قاتار ورتالىق ازيا، ەۋروپا، جاپونيا، وڭتۇستىك كورەيا جانە وزگە دە حالىقارالىق نارىقتارعا ەكسپورتتالادى.
ينۆەستورلاردىڭ ايتۋىنشا، جۇمىسشىلاردىڭ 90 پايىزى جەرگىلىكتى ازاماتتاردان قۇرالادى.
كاسىپورىننىڭ ايماق ەكونوميكاسى ءۇشىن ماڭىزىنا توقتالعان «Xinjiang Chunzheng Aosi Trading Co.، Ltd.» كومپانياسىنىڭ باس ديرەكتورى چجان ليكاي يندۋستريالىق-ەكولوگيالىق پارك قۇرامىنا زاماناۋي ءوندىرىس ورىندارى بىرىكتىرىلەتىنىن ايتىپ، بۇل باستاما اعاش وڭدەۋ سالاسىن جاڭا دەڭگەيگە كوتەرەتىنىن جەتكىزدى.
"ءبىزدىڭ جوبا ورمان اۋماقتارىن سانيتارلىق تازارتۋدى، اعاشتى باستاپقى جانە تەرەڭ وڭدەۋدى، دايىن ءونىم، بيووتىن جانە ورگانيكالىق تىڭايتقىشتار ءوندىرۋدى بىرىكتىرەدى. جوبانىڭ نەگىزگى قاعيداتى — اعاش شيكىزاتىنىڭ ءاربىر بولىگىن بارىنشا ءتيىمدى پايدالانۋ جانە وندىرىستىك قالدىقتاردىڭ كولەمىن مينيمۋمعا دەيىن ازايتۋ.
بۇل جوبا ورتتەن زارداپ شەككەن ورمان ۋچاسكەلەرىن سانيتارلىق تازارتۋ جۇمىستارىن جەدەلدەتۋگە، وڭىردە زاماناۋي وڭدەۋ ونەركاسىبىن قالىپتاستىرۋعا جانە قازاقستان مەن جۇڭگو اراسىنداعى ۇزاق مەرزىمدى ءارى ءوزارا ءتيىمدى ىنتىماقتاستىقتىڭ ۇلگىسىنە اينالاتىنىنا سەنىمدىمىز"، – دەدى چجان ليكاي.
كاسىپورىن 2028 جىلى پايدالانۋعا بەرىلەدى دەپ جوسپارلانىپ وتىر. ونىڭ ىسكە اسىرىلۋى وڭىردە اعاش وڭدەۋ ونەركاسىبىن دامىتۋعا، تابيعي رەسۋرستاردى ءتيىمدى پايدالانۋعا جانە جوعارى قوسىلعان قۇنى بار ەكسپورتقا باعدارلانعان ءونىم وندىرۋگە مۇمكىندىك بەرەدى.
ايتا كەتەيىك، بيىل وبلىستا جالپى قۇنى 131،2 ملرد تەڭگە بولاتىن 41 ينۆەستيسيالىق جوبانى ىسكە اسىرۋ جوسپارلانعان. سونىڭ ناتيجەسىندە 3263 جاڭا جۇمىس ورنى اشىلادى. ال جىل باسىنان بەرى 34،62 ملرد تەڭگە بولاتىن 14 ينۆەستيسيالىق جوبا پايدالانۋعا بەرىلىپ، 598 ادام تۇراقتى جۇمىسپەن قامتىلدى.
اباي وبلىسى اكىمىنىڭ ءباسپاسوز قىزمەتى