اباي وبلىسىندا مەردىگەر ۇيىمنان اۋداندىق ماڭىزداعى اۆتوموبيل جولىن جوندەۋ مەرزىمىن بۇزعانى ءۇشىن 12 ملن تەڭگەدەن استام ايىپپۇل ءوندىرىلىپ الىندى، دەپ حابارلايدى infohub.kz سايتى.
اباي وبلىسى سوتتارىنىڭ رەسمي Telegram-ارناسىندا جازىلعانداي، اياگوز اۋداندىق سوتى اياگوز اۋدانىنىڭ تۇرعىن ۇي-كوممۋنالدىق شارۋاشىلىق، جولاۋشىلار كولىگى، اۆتوموبيل جولدارى جانە تۇرعىن ءۇي ينسپەكسياسى ءبولىمىنىڭ ايىپپۇل ءوندىرۋ تۋرالى ازاماتتىق ءىسىن قارادى.
مەملەكەتتىك مەكەمە مەن مەردىگەر ۇيىم اراسىندا اقتوعاي — پەرەشەەك اۋداندىق ماڭىزداعى اۆتوموبيل جولىن اعىمداعى شۇڭقىر جوندەۋدەن وتكىزۋ جۇمىستارىن ورىنداۋعا شارت جاسالعان.
مەردىگەر جۇمىستى 2025 جىلعى 30 قازانعا دەيىن اياقتاۋعا مىندەتتەنگەن. شارتتىڭ جالپى سوماسى 369،5 ملن تەڭگەگە جۋىق بولدى. ورىندالعان جۇمىس كولەمى ءۇشىن بارلىعى 50 ملن تەڭگە اۋدارىلعان.
سوت انىقتاعانداي، مەردىگەر جۇمىستى اياقتاماعان جانە ونى قابىلداۋ اكتىسى بويىنشا تاپسىرىس بەرۋشىگە تاپسىرماعان، وسىلايشا شارت تالاپتارىن بۇزعان. مەملەكەتتىك مەكەمە سوتقا 2025 جىلعى 31 قازاننان 8 جەلتوقسانعا دەيىنگى مەرزىمدە ورىندالماعان مىندەتتەمەلەر مولشەرى مەن شارت تالاپتارىنا سايكەس ەسەپتەلگەن 12 ملن تەڭگەدەن ءسال استام ايىپپۇلدى ءوندىرۋ تالابىمەن جۇگىنگەن.
جاۋاپكەردىڭ پىكىرىنشە، مىندەتتەمەلەردى ورىنداۋ مەرزىمى مەملەكەتتىك ساتىپ الۋ ۆەب-پورتالىندا ورنالاستىرىلعان قوسىمشا كەلىسىممەن ۇزارتىلعان. سوت مەردىگەر ۇيىم سىلتەمە جاساعان قۇجات تاراپتار قول قويماعان، تەك مەملەكەتتىك ساتىپ الۋ ۆەب-پورتالىندا جاسالعانىن اتاپ ءوتتى. دەمەك، مۇنداي قۇجات قولدانىستاعى شارتتىڭ تالاپتارىن، ونىڭ ىشىندە مىندەتتەمەلەردى ورىنداۋ مەرزىمدەرىن وزگەرتە المايدى.
اياگوز اۋداندىق سوتىنىڭ شەشىمىمەن تالاپ-ارىز تولىق قاناعاتتاندىرىلدى. جاۋاپكەرشىلىگى شەكتەۋلى سەرىكتەستىكتەن 12 ملن تەڭگەدەن استام ايىپپۇل جانە مەملەكەت كىرىسىنە مەملەكەتتىك باج ءوندىرىلدى.
سوت شەشىمى زاڭدى كۇشىنە ەندى.