قازاقستان پرەمەر-مينيسترى ولجاس بەكتەنوۆ ورمان ءورتىن ءسوندىرۋدى ۇيلەستىرۋ ءۇشىن تجم جانە ەكولوگيا مينيسترلىگىنىڭ باسشىلارىن اباي وبلىس ورتالىعىنا شۇعىل جىبەردى، دەپ حابارلايدى infohub.kz سايتى.
پرەمەر-مينيستردىڭ بۇيرىعى بويىنشا، ايماققا توتەنشە جاعدايلار ءمينيسترى شىڭعىس ارينوۆ جانە ەكولوگيا جانە تابيعي رەسۋرستار ءمينيسترى ەرلان نىسانبايەۆ دەرەۋ جولعا شىقتى. ولارعا «سەمەي ورمانى» رەزەرۆاتى اۋماعىنداعى ءورتتى جويۋ جۇمىستارىن باسقارۋ تاپسىرىلدى.
«ءورتتىڭ الدىن الۋ جانە جاقىن ماڭداعى ەلدى مەكەندەردى قورعاۋ شارالارىن كۇشەيتۋ تاپسىرىلدى. 16 شىلدە ساعات 16:00-دەگى جاعداي بويىنشا ءورت سوندىرۋگە 400-دەن استام ادام جانە 100-گە جۋىق تەحنيكا جۇمىلدىرىلدى. 100 توننادان استام سۋ توگىلدى»، — دەپ اتاپ ءوتتى ۇكىمەتتە.
جەدەل شتابتىڭ جۇمىسى ۇكىمەت باسشىسىنىڭ جەكە باقىلاۋىندا.
بۇعان دەيىن 16 شىلدە كۇنى تاڭەرتەڭ اباي وبلىسىنىڭ «سەمەي ورمانى» اۋماعىندا ورمان ءورتى شىققانى حابارلانعان بولاتىن. ونى سوندىرۋگە جەردەگى تەحنيكا مەن اۆياسيا جۇمىلدىرىلدى. كەيىن پوليسيا «DosbolLike» بالالار لاگەرىنەن ورتكە بايلانىستى 190 بالا مەن 20 قىزمەتكەر ەۆاكۋاسيالانعانىن ناقتىلادى. پوليسيا قىزمەتكەرلەرى تج ايماعىندا قاۋىپسىزدىكتى قامتاماسىز ەتۋدى جالعاستىرۋدا.