اباي وبلىسىنداعى «سەمەي ورمانى» رەزەرۆاتى اۋماعىندا ءىرى تابيعي ءورت ءالى دە جالعاسۋدا. پرەمەر-مينيستر ولجاس بەكتەنوۆتىڭ تاپسىرماسى بويىنشا ايماققا توتەنشە جاعدايلار ءمينيسترى مەن ەكولوگيا ءمينيسترى ۇشىپ باردى، دەپ حابارلايدى infohub.kz.
ءورت «سەمەي ورمانى» مەملەكەتتىك ورمان تابيعي رەزەرۆاتىنىڭ بورودۋليحا فيليالىندا شىقتى. ونى سوندىرۋگە تجم بولىمشەلەرى، ورمان شارۋاشىلىعى قىزمەتكەرلەرى، پوليسيا، سونداي-اق تجم، قورعانىس مينيسترلىگى جانە ۇقك اۆياسياسى جۇمىلدىرىلدى. ءورتتىڭ تارالۋ قاۋپىنە بايلانىستى قۇتقارۋشىلار پوليسيا جانە اكىمدىكپەن بىرلەسىپ، «دوس-بولLike» بالالار لاگەرىنە الدىن الا ەۆاكۋاسيا جاسادى. سەمەي قالاسىنا 220 ادام، ونىڭ ىشىندە 190 بالا جانە 30 قىزمەتكەر شىعارىلدى. سوڭعى دەرەكتەر بويىنشا، كامىشەنكا اۋىلىنا تونگەن ءقاۋىپ سەيىلدى.
الدىن الا باعالاۋ بويىنشا، ءورت شامامەن 60 گەكتار ورماندى شالعان. ونى سوندىرۋگە 600-گە جۋىق ادام، 148 جەرۇستى تەحنيكاسى جانە جەتى تىكۇشاق جۇمىلدىرىلعان. اۆياسيا 81 رەت سۋ شاشىپ، جالپى كولەمى 89 توننا سۋ توگىلدى. كۇشتەردى كۇشەيتۋ ماقساتىندا ءورت ايماعىنا اباي وبلىسىنان، شىعىس قازاقستان جانە پاۆلودار وبلىستارىنان، سونداي-اق استانادان قوسىمشا تجم بولىمشەلەرى كەلدى. وپەراسياعا «ەرتىس ورمانى» كاسىپورنى مەن تجم اسكەري ءبولىمى دە قوسىلدى.
پوليسيا ءقاۋىپتى ايماققا كىرە بەرىستەردى جاۋىپ، ارنايى تەحنيكانىڭ ءوتۋىن قامتاماسىز ەتىپ، جەرگىلىكتى تۇرعىنداردىڭ مۇلكىن كۇزەتۋدە. تجم جەدەل شتابى بارلىق قىزمەتتەردىڭ جۇمىسىن ۇيلەستىرۋدە. مينيسترلىكتىڭ حابارلاۋىنشا، ماماندار جەردەن جانە اۋەدەن ءورتتى وقشاۋلاۋ جۇمىستارىن جالعاستىرۋدا.