قازاقستاندا ەرەكشە ستاتيستيكا جاريالاندى: ۇلى اقىن ابايدىڭ ەسىمىن 19 مىڭعا جۋىق ادام يەلەنگەن، ونىڭ ىشىندە ايەلدەر دە بار. بۇل تۋرالى infohub.kz سايتى حابارلايدى.
ۇلتتىق ستاتيستيكا بيۋروسىنىڭ دەرەكتەرىنە سۇيەنسەك، 18 961 قازاقستاندىق اباي اتىمەن اتالعان. بۇل ەسىمنىڭ يەلەرى ەڭ كوپ استانادا — 2 186 ادام، تۇركىستان وبلىسىندا — 2 008 ادام، الماتىدا — 1 740 ادام تىركەلگەن.
اباي ەسىمدى ەڭ جاسى ۇلكەن قازاقستاندىق 1932 جىلى دۇنيەگە كەلگەن. ەڭ كوپ تارالعان جاس توبى — 30-34 جاس، ولاردىڭ سانى 3 267 ادامدى قۇرايدى.
ۆەدومستۆونىڭ مالىمەتىنشە، اباي ەسىمى بۇگىنگى كۇنى دە تانىمالدىعىن جوعالتپاعان. تەك بيىلعى جىلدىڭ ءبىرىنشى جارتىجىلدىعىندا بۇل ەسىم 91 نارەستەگە قويىلعان. ءداستۇرلى تۇردە ەرلەر ەسىمى سانالعانىمەن، قازاقستاندا اباي ەسىمدى 9 ايەل تىركەلگەن.
سونىمەن قاتار، ەلىمىزدە يبراھيم ەسىمدى 37 844 ادام تۇرادى، ونىڭ ىشىندە يبراگيم جانە يبراحيم دەگەن جازىلۋ نۇسقالارى دا بار.
اقىننىڭ ەسىمى ەل كارتاسىندا دا كەڭىنەن كورىنىس تاپقان. اباي قۇرمەتىنە ءبىر وبلىس، ءبىر قالا، ءۇش اۋدان جانە 26 اۋىل اتالعان.
بۇعان دەيىن اقوردا مەملەكەت باسشىسى قاسىم-جومارت توقاەۆتىڭ ۇلى اقىننىڭ تۋعان كۇنى — 10 تامىزدا اتاپ وتىلەتىن اباي كۇنىمەن قۇتتىقتاۋىن جاريالاعان بولاتىن.