اباي وبلىسىنداعى «سەمەي ورمانى» رەزەرۆاتىنىڭ اۋماعىندا ءىرى ورمان ءورتى بولىپ جاتىر. پرەمەر-مينيستر ولجاس بەكتەنوۆتىڭ تاپسىرماسى بويىنشا توتەنشە جاعدايلار ءمينيسترى جانە ەكولوگيا ءمينيسترى شۇعىل تۇردە ايماققا اتتاندى، دەپ حابارلايدى infohub.kz.
ءورت «سەمەي ورمانى» مەملەكەتتىك ورمان تابيعي رەزەرۆاتىنىڭ بورودۋليحا فيليالىندا شىققان. ءورتتى سوندىرۋگە تجم بولىمشەلەرى، ورمان شارۋاشىلىعى قىزمەتكەرلەرى، پوليسيا، سونداي-اق تجم، قورعانىس مينيسترلىگى جانە ۇلتتىق قاۋىپسىزدىك كوميتەتىنىڭ اۆياسياسى جۇمىلدىرىلدى.
ءورتتىڭ تارالۋ قاۋپىنە بايلانىستى قۇتقارۋشىلار پوليسيا جانە اكىمدىكپەن بىرلەسىپ «دوس-بولLike» بالالار لاگەرىنەن الدىن الا ەۆاكۋاسيا جۇرگىزدى. بارلىعى سەمەيگە 220 ادام، ونىڭ ىشىندە 190 بالا جانە 30 لاگەر قىزمەتكەرى جەتكىزىلدى. سوڭعى دەرەكتەر بويىنشا، كامىشەنكا اۋىلىنا تونگەن ءقاۋىپ جويىلدى.
الدىن الا مالىمەتتەر بويىنشا، ءورت شامامەن 60 گەكتار ورماندى الىپ جاتىر. ورتپەن كۇرەسكە 600-گە جۋىق ادام، 148 بىرلىك جەر ءۇستى تەحنيكاسى جانە جەتى تىكۇشاق جۇمىلدىرىلدى. اۆياسيا 89 توننا سۋدى 81 رەت توگىپ ۇلگەردى. توپتى كۇشەيتۋ ءۇشىن ايماققا اباي وبلىسىنان، شىعىس قازاقستان جانە پاۆلودار وبلىستارىنان، سونداي-اق استانادان قوسىمشا تجم بولىمشەلەرى كەلدى. وپەراسياعا «ەرتىس ورمانى» كۇشتەرى مەن تجم اسكەري ءبولىمى دە قوسىلدى.
پوليسيا ءقاۋىپتى ايماققا كىرەتىن جولداردى جاۋىپ، ارنايى تەحنيكانىڭ ءوتۋىن قامتاماسىز ەتىپ، تۇرعىنداردىڭ مۇلكىن كۇزەتۋدە. تجم جەدەل شتابى بارلىق قىزمەتتەردىڭ جۇمىسىن ۇيلەستىرىپ وتىر. قازىرگى ۋاقىتتا ماماندار ءورتتى جەردەن جانە اۋەدەن وقشاۋلاۋ جۇمىستارىن جالعاستىرۋدا.