ابيدوستان تابىلعان سۇيەك قالدىقتارىنا جۇرگىزىلگەن سوت-مەديسينالىق ساراپتاما ەجەلگى مىسىر بيلەۋشىلەرىنىڭ قىزمەتشىلەرى ادەيى ولتىرىلگەن بولۋى مۇمكىن ەكەنىن كورسەتتى، دەپ جازادى The Guardian. پەرديۋ ۋنيۆەرسيتەتىنىڭ بيوارحەولوگى روزالين كەمپبەلل ابيدوستاعى ۋمم ەل-كااب پاتشالىق نەكروپولىنەن تابىلعان، جاسى شامامەن 5000 جىلعا جۋىقتايتىن باس سۇيەكتەردى زەرتتەدى، دەپ حابارلايدى infohub.kz سايتى.
كەمبريدج ۋنيۆەرسيتەتىنىڭ داكۆورت كوللەكسياسىندا ساقتالعان سۇيەك قالدىقتارىنا جاسالعان سوت ساراپتاماسىنىڭ ناتيجەلەرى Frontiers in Environmental Archaeology جۋرنالىندا جاريالاندى. عالىمداردىڭ جۇمىسى ەجەلگى مىسىردىڭ ءبىرىنشى اۋلەتى بيلەۋشىلەرىنىڭ عۇرىپتىق تاجىريبەلەرىنە جاڭاشا قاراۋعا مۇمكىندىك بەرەدى.
زەرتتەۋ بارىسىندا مىسىرتانۋشى فليندەرس پيتري شامامەن ءبىر عاسىر بۇرىن العاش قازبا جۇمىستارىن جۇرگىزگەن 46 باس سۇيەكتىڭ 18-ىندە (شامامەن 39%) ءولىم الدىنداعى جاراقاتتار انىقتالدى. سۇيەكتەردەگى سىزىقتىق سىنىقتاردىڭ سيپاتى اعاشتان نەمەسە مۇيىزدەن جاسالعان جالپاق دوعال زاتتارمەن ادەيى سوققى جاسالعانىن، ال تاستان جاسالعان شوقپارلار قولدانىلماعانىن كورسەتەدى. بۇل دەرەكتەر مونارحتى و دۇنيەدە شىعارىپ سالۋ ءۇشىن قىزمەتشىلەردى عۇرىپتىق قۇرباندىققا شالۋ تۋرالى بولجامدى راستايدى.
الاباماداعى سامفورد ۋنيۆەرسيتەتىنىڭ مىسىرتانۋشىسى دون ماككورماكتىڭ ايتۋىنشا، قول استىنداعىلاردى قۇرباندىققا شالۋ تاجىريبەسى ۇزاققا سوزىلماعان جانە ەكىنشى اۋلەت تۇسىندا توقتاعان. بيلەۋشىلەر ساياسي تۇراقسىزدىققا بايلانىستى قاتىگەز عۇرىپتان باس تارتىپ، ادام قۇرباندىقتارىن قىزمەتشىلەردىڭ اعاشتان جانە تاستان جاسالعان مۇسىنشەلەرىمەن — ۋشەبتيمەن الماستىرعان. زەرتتەۋ اۆتورلارى ەسكى مۇراجاي كوللەكسيالارىن زاماناۋي ادىستەرمەن ودان ءارى زەردەلەۋ قاجەتتىگىن اتاپ وتەدى.