بوستون ۋنيۆەرسيتەتىنىڭ عالىمدارى ABT-263 پرەپاراتىن تەرىگە جەرگىلىكتى قولدانۋ قارتايعان جاسۋشالاردى جوياتىنىن جانە تەرىنىڭ قالپىنا كەلۋىن ايتارلىقتاي جەدەلدەتەتىنىن انىقتادى، دەپ حابارلايدى infohub.kz سايتى.
بوستون ۋنيۆەرسيتەتىنىڭ ارام چوبانيان جانە ەدۆارد اۆەديسيان اتىنداعى مەديسينا مەكتەبىنىڭ زەرتتەۋشىلەرى ABT-263 پرەپاراتىن تەرىگە جەرگىلىكتى جاعۋ قارتايعان تەرىدەگى جارالاردىڭ جازىلۋىن ەداۋىر جەدەلدەتەتىنىن انىقتادى. دەنيەل رو باسقارعان زەرتتەۋ توبىنىڭ ناتيجەلەرى "Aging" عىلىمي جۋرنالىندا جاريالاندى.
جاس ۇلعايعان سايىن اعزا تىندەرىندە قارتايعان (سەنەسەنتتى) جاسۋشالار جيناقتالادى. ولار ءبولىنۋدى توقتاتادى، ءبىراق ولمەيدى، سوزىلمالى قابىنۋدى تۋدىراتىن جانە تابيعي قالپىنا كەلۋگە كەدەرگى جاسايتىن زاتتار بولەدى. ABT-263 پرەپاراتى سەنوليتيكتەر كلاسىنا جاتادى — بۇل زاقىمدالعان جاسۋشالاردى ساۋ جاسۋشالارعا زيان كەلتىرمەي تاڭدامالى تۇردە جوياتىن زاتتار.
تاجىريبە بارىسىندا عالىمدار ABT-263ء-تىڭ گەل ءتۇرىن 24 ايلىق تىشقانداردىڭ تەرىسىنە بەس كۇن بويى جاقتى. ناتيجەسىندە تاجىريبەلىك جانۋارلاردا جاسۋشالىق قارتايۋ ماركەرلەرى p16 جانە p21 تومەندەدى. زاقىمدالعاننان كەيىنگى 24ء-شى كۇنى وڭدەلگەن تىشقانداردىڭ 80%-ىندا جارالار تولىق جازىلدى، ال باقىلاۋ توبىندا بۇل كورسەتكىش 56% بولدى. جاس تەرىدە پرەپارات مۇنداي اسەر بەرمەدى.
زەرتتەۋشىلەر سەنەسەنتتى جاسۋشالاردى جويۋ كوللاگەن وندىرۋگە، جاڭا تامىرلاردىڭ قالىپتاسۋىنا جانە تىندەردىڭ قايتا قۇرىلۋىنا جاۋاپ بەرەتىن گەندەردى بەلسەندىرەتىن قىسقا مەرزىمدى قابىنۋ رەاكسياسىن تۋدىرعانىن اتاپ ءوتتى. ءدارىنى جەرگىلىكتى قولدانۋ سەنوليتيكتەردى ىشكە قابىلداۋعا ءتان جاناما اسەرلەردەن اۋلاق بولۋعا مۇمكىندىك بەردى. اۆتورلاردىڭ پىكىرىنشە، ادىستەمەنى ادامدارعا كلينيكالىق سىناقتار جۇرگىزىلگەننەن كەيىن قارت ادامداردىڭ وپەراسيا الدىنداعى دايىندىعى مەن سوزىلمالى جارالارىن ەمدەۋ ءۇشىن قولدانۋعا بولادى.