VIII شاقىرىلىمداعى ءماجىلىس دەپۋتاتى نارتاي ارالباي ۇلى ءوز پاراقشاسىندا قۋانىشتى جاڭالىقپەن ءبولىستى، دەپ حابارلايدى Alash.kz پورتالى.
نارتاي ارالباي ۇلى زەينەتاقى جۇيەسىندەگى ماڭىزدى وزگەرىس تۋرالى مالىمدەدى. ەندى قازاقستاندىقتار زەينەتاقى قورىنداعى قاراجاتتىڭ 100 پايىزىن ينۆەستيسيالىق پورتفەلدى باسقارۋشى كومپانيالارعا سەنىپ تاپسىرا الادى.
«حالىق زەينەتاقى قورىنداعى قاراجاتتىڭ 100 پايىزىن ءوز بەتىنشە باسقارا باستادى! ءقازىر جالاقىدان اي سايىنعى 10% زەينەتاقى اۋدارىمدارىن ۇلتتىق بانك باسقارادى. ولار اقشانى مەملەكەتتىك جوبالارعا، قارجى مينيسترلىگىنىڭ باعالى قاعازدارىنا سالادى، ياعني ينۆەستيسيالايدى. ودان تۇسكەن تابىس تومەن. ال باسقارۋشى كومپانيالار باسەكەلەس ورتادا ءسىزدىڭ قاراجاتىڭىزدى الدەقايدا كىرىستى باعىتتارعا سالىپ، ونى ارتتىرا الادى. بۇل نورمانى مەن ارىپتەسىم اسحات قانات ۇلىمەن بىرگە ۇسىندىق.
ەندى ءسىز ءوزىڭىزدىڭ زەينەتاقى جيناقتارىڭىزدىڭ 100 پايىزىن كىمگە سەنىپ تاپسىرۋدى ءوزىڭىز شەشەسىز. ول ءۇشىن ءوتىنىش جازىپ، قاراجاتىڭىزدى باسقاراتىن جانە ينۆەستيسيالايتىن ۇيىمدى تاڭداۋ كەرەك. سوعان سايكەس تابىس تا ارتادى.
ەڭ باستىسى: بۇل مىندەتتى ەمەس، ءسىز قاراجاتتى باسقارۋشى كومپانياعا تەك قالاۋىڭىز بويىنشا تاپسىراسىز. ءتىپتى جيناقتارىڭىزدى بىرنەشە بولىككە بولۋگە دە بولادى.
ەڭ باستى سۇراق: اقشامدى جوعالتىپ الامىن با؟ قاراجاتىم كۇيىپ كەتپەي مە؟ زاڭ بويىنشا، باسقارۋشى كومپانيالار ءسىز اۋدارعان نەگىزگى سومانىڭ تولىق ساقتالۋىنا كەپىلدىك بەرەدى. باسقارۋشى كومپانيالاردىڭ بۇل جۇمىسى مەن قىزمەتىن ۇلتتىق بانك پەن مەملەكەت قاتاڭ باقىلايدى!» — دەپ جازدى نارتاي ارالباي ۇلى.