جەتىسۋ وبلىسىنداعى تالدىقورعان-تەكەلى تاس جولىندا كەلە جاتقان Toyota Camry كولىگىنە اعاش قۇلاپ، جۇرگىزۋشى زارداپ شەكتى. بۇل تۋرالى infohub.kz سايتى حابارلايدى.
وقيعا 21 شىلدەدە قارابۇلاق-تەكەلى تاس جولىنىڭ «ءومىر بۇلاق» تۇسىندا بولعان. قاتتى جەلدىڭ سالدارىنان اعاش جول ۇستىنە قۇلاپ، ءوتىپ بارا جاتقان كولىكتى باسىپ قالعان.
جەتىسۋ وبلىسى توتەنشە جاعدايلار دەپارتامەنتىنىڭ مالىمەتىنشە، كولىك سالونىندا بەس ادام بولعان. «وقيعا سالدارىنان جۇرگىزۋشى جاراقات الدى. كولىكتە ادامدار قامالىپ قالعان جوق»، — دەپ مالىمدەدى تجد.
وقيعا ورنىنا كەلگەن قۇتقارۋشىلار قۇلاعان اعاشتى ارالاپ، جولدى تازارتىپ، كولىكتەردىڭ ءقاۋىپسىز قوزعالىسىن قامتاماسىز ەتتى. ەسكەلدى اۋدانى اكىمدىگىنىڭ ايتۋىنشا، زارداپ شەككەن جۇرگىزۋشى ورتالىق اۋداندىق اۋرۋحاناعا جەتكىزىلگەن. «جۇرگىزۋشىنىڭ جاعدايى تۇراقتى»، — دەدى اۋدان اكىمدىگى.
قۇتقارۋشىلار جۇرگىزۋشىلەردى قاتتى جەلدە ساق بولۋعا، جىلدامدىقتى قاۋىپسىزدىك تالاپتارىنا ساي تاڭداۋعا جانە جولعا اعاش نەمەسە باسقا زاتتاردىڭ قۇلاۋ ءقاۋپىن ەسكەرۋگە شاقىردى.