قازاقستان پرەزيدەنتى اكىمشىلىگىنىڭ مەملەكەتتىك-قۇقىقتىق ءبولىمىنىڭ بۇرىنعى مەڭگەرۋشىسى ايدار جارىلعانوۆ جاڭا قىزمەتكە تاعايىندالدى — ول قازاقستان رەسپۋبليكاسىنىڭ ادىلەت ۆيسە-مينيسترى بولدى. ءتيىستى قاۋلىعا ەل ۇكىمەتى قول قويدى، بۇل تۋرالى مينيسترلەر كابينەتىنىڭ ءباسپاسوز قىزمەتى حابارلادى، دەپ جازادى infohub.kz سايتى.
ەسكە سالايىق، وسىدان بىرنەشە كۇن بۇرىن، 2 قازاندا مەملەكەت باسشىسى قاسىم-جومارت توقايەۆ جارىلعانوۆتى پرەزيدەنت اكىمشىلىگىنىڭ مەملەكەتتىك-قۇقىقتىق ءبولىمىنىڭ مەڭگەرۋشىسى قىزمەتىنەن بوساتقان بولاتىن. وسىلايشا، كادرلىق اۋىسۋ ءبىر اپتانىڭ ىشىندە جۇزەگە استى.
اقوردا سايتىندا جاريالانعان مالىمەتتەرگە سايكەس، ايدار تولەتاي ۇلى جارىلعانوۆ 1978 جىلى سەمەي قالاسىندا دۇنيەگە كەلگەن. 1999 جىلى «سەمەي» مەملەكەتتىك ۋنيۆەرسيتەتىن، 2001 جىلى «ادىلەت» جوعارى قۇقىق مەكتەبىن بىتىرگەن.
2001–2007 جىلدارى جارىلعانوۆ مەملەكەتتىك كىرىستەر مينيسترلىگىندە جانە قازاقستان رەسپۋبليكاسى قارجى مينيسترلىگىنىڭ سالىق كوميتەتىندە قىزمەت ەتتى.
2007 جىلدان 2019 جىلدىڭ ساۋىرىنە دەيىن ول پرەزيدەنت اكىمشىلىگىندە جۇمىس ىستەپ، پرەزيدەنت اكىمشىلىگى مەملەكەتتىك-قۇقىقتىق ءبولىمىنىڭ ساراپشىسى، كەڭەسشىسى، ينسپەكتورى جانە سەكتور مەڭگەرۋشىسى قىزمەتتەرىن كەزەكپەن اتقاردى.
2019 جىلدىڭ ساۋىرىنەن 2023 جىلدىڭ قاڭتارىنا دەيىنگى ارالىقتا جارىلعانوۆ پرەزيدەنت اكىمشىلىگى مەملەكەتتىك-قۇقىقتىق ءبولىمى مەڭگەرۋشىسىنىڭ ورىنباسارى قىزمەتىندە بولدى.
2023 جىلدىڭ 6 قاڭتارىندا مەملەكەت باسشىسىنىڭ وكىمىمەن ول پرەزيدەنت اكىمشىلىگىنىڭ مەملەكەتتىك-قۇقىقتىق ءبولىمىنىڭ مەڭگەرۋشىسى بولىپ تاعايىندالدى.
ايدار جارىلعانوۆ 2020 جىلى «قۇرمەت» وردەنىمەن، سونداي-اق 2013 جىلى قازاقستان رەسپۋبليكاسىنىڭ قۇرمەت گراموتاسىمەن ماراپاتتالعان.