اباي وبلىسىندا «ايدارلى» كەن-بايىتۋ كومبيناتىنىڭ (كبك) قۇرىلىسىنىڭ باستالۋىنا ارنالعان سالتاناتتى شارا ءوتتى. جاڭا كومبينات قازاقستاننىڭ تاۋ-كەن ونەركاسىبىندەگى ءىرى جوبالاردىڭ بىرىنە اينالىپ، ەلدىڭ ونەركاسىپتىك دامۋىنا ەلەۋلى ۇلەس قوسادى دەپ كۇتىلۋدە، دەپ حابارلايدى infohub.kz.
سالتاناتتى شاراعا ق ر پرەمەر-مينيسترىنىڭ ءبىرىنشى ورىنباسارى نۇرلىبەك نالىبايەۆ، وبلىس اكىمى بەرىك ءۋالي، كومپانيا باسشىلىعى مەن سەرىكتەستەر قاتىستى. جوبانى «Aidarly Mining» ج ش س جۇزەگە اسىرۋدا.
«ايدارلى» كبك تولىق قۋاتىنا شىققاندا جىلىنا 75 ملن توننا كەن وڭدەي الادى. كاسىپورىن مىس كونسەنتراتىندا جىلىنا 226 مىڭ توننا مىس جانە موليبدەن كونسەنتراتىندا 3،55 مىڭ توننا موليبدەن وندىرەتىن بولادى. وندىرىستىك كەشەن قۇرامىنا كارەر، ۇساقتاۋ كەشەنى، بايىتۋ فابريكاسى، ەنەرگەتيكالىق، كولىكتىك جانە ينجەنەرلىك ينفراقۇرىلىم نىساندارى، سونداي-اق جۇمىسشىلاردىڭ جايلى دەمالۋى مەن سپورتپەن شۇعىلدانۋىنا ارنالعان اۋماقتارى بار ۆاحتالىق قالاشىق كىرەدى.
باسقارۋشى كومپانيانى تانىستىرعان «اقتوبە مىس كومپانياسى» ج ش س باس ديرەكتورى فاريت سۋفيانوۆ اتاپ وتكەندەي، جوبانىڭ قازاقستان ەكونوميكاسى ءۇشىن ەلەۋلى مۋلتيپليكاتيۆتىك اسەرى بار.
««ايدارلى» كبك-دا 3 مىڭنان استام جۇمىس ورنى قۇرىلادى، ال جوبانى ىسكە اسىرۋدا ءبىز قازاقستاندىق مامانداردىڭ، مەردىگەرلەر مەن جەتكىزۋشىلەردىڭ الەۋەتىن بارىنشا پايدالانۋدى جوسپارلاپ وتىرمىز. ءبىزدىڭ باعالاۋىمىزشا، جوبانى ىسكە اسىرۋدىڭ بارلىق كەزەڭىندەگى جيىنتىق سالىق تۇسىمدەرى 1،43 ترلن تەڭگەدەن اسادى»، – دەدى «اقتوبە مىس كومپانياسى» ج ش س باس ديرەكتورى فاريت سۋفيانوۆ.
«Aidarly Mining» ج ش س قۇرىلتايشىسى ەدۋارد وگاي جاڭا كەن-بايىتۋ كومبيناتى اباي وبلىسىنىڭ دامۋىنا جاڭا سەرپىن بەرىپ، ءوڭىردىڭ ونەركاسىپتىك الەۋەتىن نىعايتاتىنىن اتاپ ءوتتى.
«بۇگىن ءبىز «ايدارلى» جوباسىنىڭ جاڭا كەزەڭىنە – بولاشاق كاسىپورىننىڭ قۇرىلىسىنا كوشىپ وتىرمىز. ونىڭ الدىندا گەولوگيالىق بارلاۋ، جوبالاۋ، ينجەنەرلىك شەشىمدەردى ازىرلەۋدى قامتيتىن ۇلكەن دايىندىق جۇمىستارى جۇرگىزىلدى. «ايدارلى» قازاقستاننىڭ تاۋ-كەن ونەركاسىبىنىڭ دامۋىنا ۇلەس قوسادى دەپ سەنەمىز. ءبىز ءۇشىن بۇل – وڭىرگە سالىنعان ينۆەستيسيا، جاڭا جۇمىس ورىندارى، زاماناۋي تەحنولوگيالار جانە بولاشاق دامۋ مۇمكىندىكتەرى»، – دەدى ەدۋارد وگاي.
جوبانى ىسكە اسىرۋدىڭ باستى قاعيداتتارىنىڭ ءبىرى – قورشاعان ورتاعا جاۋاپكەرشىلىكپەن قاراۋ. ءوندىرىس قازىرگى ەكولوگيالىق تالاپتاردى ەسكەرە وتىرىپ جوبالانۋدا جانە تەحنولوگيالىق پروسەستە سۋدى تازارتىپ قايتا پايدالانۋعا مۇمكىندىك بەرەتىن تۇيىق سۋ اينالىمى سيكلىن كوزدەيدى. كەن ورنىن يگەرۋ اياقتالعاننان كەيىن ەلدىڭ ەكولوگيالىق زاڭناماسىنىڭ تالاپتارىنا سايكەس بۇزىلعان جەرلەردى كەشەندى رەكۋلتيۆاسيالاۋ جۇرگىزىلەدى.