2 قىركۇيەكتەن باستاپ قازاقستاندا تاعى ءبىر ايەلدەر ۆاگونى پايدا بولادى. جاڭا ۆاگون استانانى باتىس قازاقستان وبلىسىمەن بايلانىستىراتىن تالگو №81/82 «نۇرلى جول — ورال» پويىزىنىڭ قۇرامىنا قوسىلادى. بۇل شەشىم جولاۋشى ايەلدەر تاراپىنان سۇرانىستىڭ جوعارى بولۋىنا بايلانىستى قابىلداندى، دەپ infohub.kz حابارلايدى.
№81/82 پويىزى كۇنارا ءجۇرىپ، توعىز ايالداما جاسايدى. جاڭا ۆاگوننىڭ ىسكە قوسىلۋىمەن ايەلدەر ۆاگوندارى بار باعىتتار سانى 13-كە جەتەدى.
قازىرگى ۋاقىتتا ايەلدەر ۆاگوندارى كەلەسى باعىتتار بويىنشا جۇرەدى: الماتى-2 – ماڭعىستاۋ؛ الماتى-2 – وسكەمەن-1؛ پاۆلودار – تۇركىستان؛ ماڭعىستاۋ – سەمەي؛ اتىراۋ – نۇرلى جول؛ الماتى-1 – اقتوبە؛ نۇرلى جول – الماتى-2؛ نۇرلى جول – شىمكەنت؛ اقتوبە – الماتى-1؛ الماتى-2 – شىمكەنت؛ نۇرلى جول – سەمەي؛ ورال – ماڭعىستاۋ؛ نۇرلى جول – ورال.
ايەلدەر ۆاگوندارىندا ايەلدەر، سونداي-اق ەرەسەكتەردىڭ ەرتىپ جۇرۋىمەن جەتى جاسقا دەيىنگى ۇل بالالار عانا جۇرە الادى. بيلەت ساتىپ الۋ كەزىندە «جن» بەلگىسىنە نازار اۋدارۋ كەرەك. ايەلدەر ۆاگوندارىنداعى بيلەت باعاسى قاراپايىم بيلەتتەردەن ەرەكشەلەنبەيدى.
قازاقستاندا العاشقى ايەلدەر ۆاگوندارى 2021 جىلدىڭ قازان ايىندا پايدا بولدى. سوندا ولار ەكى باعىت بويىنشا جولعا شىقتى: الماتى – ماڭعىستاۋ جانە الماتى – وسكەمەن.
بۇعان دەيىن استانادا قتج لوكوموتيۆتەرى مەن ماشينيست سيمۋلياتورى بار جاڭا مۇراجايدىڭ اشىلعانى حابارلانعان بولاتىن.