قازاقستاندىق Air Astana اۋەكومپانياسى ەلوردانى بانگكوكپەن جالعايتىن جاڭا باعىت اشتى. استانا — بانگكوك — استانا باعىتىنداعى ۇشۋلار 2026 جىلعى 11 جەلتوقساندا باستالىپ، اپتاسىنا ەكى رەت — سەيسەنبى جانە جۇما كۇندەرى ورىندالادى، دەپ حابارلايدى infohub.kz سايتى.
رەيستەردى Airbus A321LR ۇشاعى ورىندايدى. استانادان بانگكوكقا ۇشۋ ۋاقىتى — 7 ساعات 50 مينۋت، كەرى باعىتتا — 8 ساعات 25 مينۋت.
ەكونومكلاستاعى بارىپ-قايتۋ بيلەتىنىڭ ەڭ تومەن باعاسى 244 616 تەڭگەدەن، بيزنەس-كلاستا — 969 496 تەڭگەدەن باستالادى.
كولىك مينيسترلىگىنىڭ ناقتىلاۋىنشا، جاڭا باعىت ىسكە قوسىلعان سوڭ قازاقستان مەن تايلاند اراسىنداعى رەيستەردىڭ جالپى سانى ءتورت باعىت بويىنشا اپتاسىنا 20-عا جەتەدى.
قازىرگى تاڭدا اۋەكومپانيالار مىنا باعىتتار بويىنشا ۇشادى: الماتى — پحۋكەت — اپتاسىنا جەتى رەيس (Air Astana)؛ الماتى — بانگكوك — اپتاسىنا توعىز رەيس (التاۋىن Air Astana، ۇشەۋىن Thai AirAsia X ورىندايدى)؛ شىمكەنت — بانگكوك — اپتاسىنا ەكى رەيس (SCAT).
جاڭا باعىتقا بيلەتتەر Air Astana سايتىندا، قوسىمشاسىندا، سونداي-اق اككرەديتتەلگەن تۋريستىك اگەنتتىكتەردە ءقازىردىڭ وزىندە قولجەتىمدى.
بۇعان دەيىن Kursiv LifeStyle تايلاند استاناسىندا جاڭبىر ماۋسىمىنا بايلانىستى سۋ تاسقىنى بولىپ، بيلىك بانگكوكتىڭ بارلىق 50 اۋدانىندا اپات رەجيمىن جاريالاعانىن حابارلاعان ەدى.