Air Astana بيزنەس-كلاسسقا بيلەت ساتىپ العان جولاۋشىلار ۇشاق اۋىستىرىلعاندىقتان ۋادە ەتىلگەن جايلى جاعدايعا قول جەتكىزە الماعانىن ايتىپ، اۆياكومپانيا بۇل جاعدايعا تۇسىنىكتەمە بەردى، دەپ حابارلايدى infohub.kz.
Threads الەۋمەتتىك جەلىسىندە medina.style_ قولدانۋشىسى اۆياتاسىمالداۋشىعا شاعىم جازدى. ونىڭ ايتۋىنشا، ول الماتى — گۋانچجوۋ رەيسىنە جات قىزىلاتىن ورىندىقتارى بار بيزنەس-كلاسس بيلەتتەرىن تولەگەن، ءبىراق ۇشۋعا از ۋاقىت قالعاندا ۇشاق اۋىستىرىلعان.
«ۇشۋعا بىرنەشە ساعات قالعاندا سىزدەر ۇشاقتى تىنىش اۋىستىرىپ جىبەردىڭىزدەر، مەنىڭ "جات قىزىلاتىن بيزنەسىم" ارقاسى 15 گرادۋسقا قيساياتىن قاراپايىم ورىندىققا اينالدى. بالامەن 6 ساعات وتىرىپ ۇشتىم. تۇندە! جات قىزىلاتىن ورىننىڭ اقشاسىن تولەپ. بۇل مۇلدەم بيزنەس ەمەس! الدىن الا ەسكەرتۋ كەرەك ەدى عوي؟ ولار ماعان باسقا بيلەت ساتىپ الۋ نەمەسە كۇنىن وزگەرتۋ مۇمكىندىگىنەن ايىردى»، — دەپ نارازىلىعىن ءبىلدىردى ايەل.
پوست استىنداعى پىكىرلەردە بىرنەشە قولدانۋشى وسىنداي ماسەلەگە تاپ بولعانىن ايتتى. ولاردىڭ ءبىرى: «چەرنوگورياعا ۇشتىق. تولىق بيزنەس ءۇشىن ۇلكەن اقشا تولەدىك. ناتيجەسىندە الماتىدان ۇشامىز، بىزگە اۆتور جازعان ۇشاقتى اۋىستىرىپ بەرەدى. اشۋىمىز قوينىنا سىيمادى. تۋروپەراتورىمىز ۇرىستى، ءبىراق ەش ناتيجە بولمادى. Air Astana ايىرماشىلىقتى قايتارۋعا نەمەسە كەلەسى ۇشۋلارعا جەڭىلدىك جاساۋعا مىندەتتى دەپ ويلايمىن»، — دەپ جازدى.
تاعى ءبىر قولدانۋشى: «بۇگىن تاڭەرتەڭ گۋانچجوۋ — الماتى باعىتىندا ۇشتىق. ەكى بيزنەس بيلەت ساتىپ الدىق، سونىمەن قاتار ىڭعايلى ۇشۋ ءۇشىن ارنايى ورىندار تاڭدادىق. ستاندارتتى بيلەتتەن 3 ەسە قىمبات تولەدىك، ناتيجەسىندە ەڭ قاراپايىم ۇشاقپەن ۇشتىق»، — دەپ اتاپ ءوتتى.
Air Astana اۆياكومپانياسى ۇشاق اۋىستىرۋ جاعدايىنا تۇسىنىكتەمە بەردى: «اۋە كەمەسىن اۋىستىرۋ — ءماجبۇرلى شارا، ول وپەراسيالىق نەمەسە تەحنيكالىق سەبەپتەرگە بايلانىستى بولۋى مۇمكىن. بۇل رەتتە جولاۋشىلاردىڭ قاۋىپسىزدىگى ءبىز ءۇشىن ءارقاشان باستى باسىمدىق بولىپ قالادى. بيزنەس-كلاسس ورىندىقتارىنىڭ كونفيگۋراسياسى كۇتكەننەن وزگەشە بولعانىنا شىنايى وكىنەمىز».