تامىز ايىنىڭ باسىنان باستاپ قىتايلىق Air China اۋەكومپانياسى استانا — پەكين باعىتىنداعى رەيستەر جيىلىگىن اپتاسىنا التى رەتكە دەيىن ارتتىردى، دەپ حابارلايدى infohub.kz سايتى.
استانا حالىقارالىق اۋەجايىنىڭ ءباسپاسوز قىزمەتىندە اتاپ وتكەندەي، ەندى ءۇش رەيس تىكەلەي، ال تاعى ۇشەۋى سيان قالاسىنا ارالىق قونۋ ارقىلى ورىندالادى.
قازاقستان استاناسىنان پەكينگە تىكەلەي رەيستەر سەيسەنبى، بەيسەنبى جانە سەنبى كۇندەرى قولجەتىمدى. استانا — سيان — پەكين باعىتى بويىنشا جولاۋشىلار دۇيسەنبى، سارسەنبى جانە جۇما كۇندەرى ۇشا الادى.
وسىنىڭ ارقاسىندا ساياحاتشىلاردىڭ قىتايعا ىسكەرلىك جانە تۋريستىك ساپارلاردى جوسپارلاۋ مۇمكىندىكتەرى كەڭەيدى. اۋەجايدا رەيستەر جيىلىگىنىڭ ارتۋى قازاقستان مەن جۇڭگو اراسىنداعى اۋە قاتىناسىن ودان ءارى دامىتۋعا، سونداي-اق ەلدەر اراسىنداعى تۋريستىك، ەكونوميكالىق جانە ىسكەرلىك بايلانىستاردى نىعايتۋعا ىقپال ەتەتىنىن اتاپ ءوتتى.
Air China — شتاب-پاتەرى پەكيندە ورنالاسقان قىتايدىڭ ۇلتتىق اۋە تاسىمالداۋشىسى. كومپانيا Star Alliance حالىقارالىق اۆياسيالىق اليانسىنىڭ مۇشەسى بولىپ تابىلادى، ال ونىڭ باعىتتار جەلىسى جۇڭگو، ازيا، ەۋروپا جانە الەمنىڭ باسقا ايماقتارىنداعى قالالاردى قامتيدى. 2025 جىلى Air China توبى شامامەن 160 ميلليون جولاۋشىنى تاسىمالدادى.
الدىڭعى كۇنى پەكيندە قازاقستان كولىك مينيسترلىگىنىڭ ازاماتتىق اۆياسيا كوميتەتى مەن جۇڭگو ازاماتتىق اۆياسيا اكىمشىلىگى (CAAC) اراسىندا اۋە تاسىمالى سالاسىنداعى ىنتىماقتاستىقتى كەڭەيتۋ ماسەلەلەرى بويىنشا كەلىسسوزدەر ءوتتى.