جوڭعار الاتاۋى ۇلتتىق پاركىندەگى فوتوكاقپانعا ارقاسىن اعاشقا قىسىپ جاتقان ايۋ ءتۇسىپ قالدى، دەپ حابارلايدى infohub.kz.
جازدا تيان-شان قوڭىر ايۋى قىستا جۇمساعان كۇشىن قالپىنا كەلتىرىپ، مامىر قورىن جيناي باستايدى. ازىق ىزدەپ كوبىنەسە تاڭەرتەڭ ەرتە جانە كەشكە سالقىن كەزدە شىعادى.
ورمان شارۋاشىلىعى جانە جانۋارلار دۇنيەسى كوميتەتىنىڭ مالىمەتىنشە، بۇل ايۋ سيۆەرس الما اعاشىنىڭ تۇقىمىنىڭ تابيعي تارالۋىنا ىقپال ەتەدى. سيۆەرس الما اعاشى – سيرەك كەزدەسەتىن باعالى جابايى جەمىس اعاشى، ول مادەني الما سورتتارىنىڭ اتاسى سانالادى.
فوتوكاقپان كادرلارى مەن جوڭعار الاتاۋى ۇلتتىق پاركىندە جۇرگىزىلگەن مونيتورينگكە قاراعاندا، تيان-شان قوڭىر ايۋى ءجيى كەزدەسە باستادى، ال ونىڭ سانى بىرتىندەپ ارتىپ كەلەدى.
بۇعان دەيىن حابارلاعانىمىزداي، الماتى حايۋاناتتار باعىنداعى تيان-شان ايۋلارىنىڭ كۇشىكتەرىنە ات قويىلدى.