اق ءۇيدىڭ رەسمي سايتىنداعى Tetris ستيلىندەگى «قابىرعا تۇرعىز» (Build The Wall) ويىنى اۆتورلىق قۇقىق ماسەلەسىنە بايلانىستى جويىلدى. بۇل تۋرالى infohub.kz سايتى حابارلايدى.
ويىنشىلار شەكارانى قورعاۋ ءۇشىن بلوكتاردان قابىرعا تۇرعىزاتىن ويىن اق ءۇي سايتىنداعى بەس اركادا ويىنىنىڭ ءبىرى ەدى. الايدا Tetris كومپانياسى ويىننىڭ سىرتقى تۇرىنە قاتىستى شاعىم بىلدىرگەننەن كەيىن، ول سايتتان الىنىپ تاستالدى. 4 قىركۇيەكتە Tetris كومپانياسىنىڭ رەسمي X پاراقشاسىندا ويىننىڭ جاسالۋىنا كومپانيانىڭ قاتىسى جوق ەكەندىگى جانە اۆتورلىق قۇقىق بۇزۋشىلىققا وتە بايىپپەن قارايتىندىعى تۋرالى حابارلانعان بولاتىن.
اق ءۇي اكىمشىلىگى بۇل ارەكەتكە رەسمي تۇسىنىكتەمە بەرمەگەن، ال ويىننىڭ جويىلۋ سەبەبى تۋرالى سۇراقتارعا جاۋاپ بەرۋدەن باس تارتقان. Tetris كومپانياسى ءوز مالىمدەمەسىندە: «ءبىز ادامداردى بىرىكتىرەتىن كۇشكە سەنەمىز، ال بولۋگە ەمەس. بارلىق جانكۇيەرلەرىمىزگە: ءبىز سىزدەردى جاقسى كورەمىز، سىزدەردى كورەمىز جانە قاۋىمداستىعىمىزدا بولعاندارىڭىزعا ريزامىز»، — دەپ جازدى.
ايتا كەتەيىك، Tetris كومپانياسى بۇعان دەيىن دە اۆتورلىق قۇقىق بۇزۋشىلىقتار بويىنشا سوت ىستەرىندە جەڭىسكە جەتكەن. مىسالى، 2012 جىلى iPhone ويىنى Mino جاساۋشىلارىمەن كەلىسىمگە كەلىپ، ولار كومپانيانىڭ بلوكتاردى قۇراستىرۋ ويىنىنىڭ كورىنىسىن ۇرلاعانى ءۇشىن بەلگىسىز سوما تولەگەن بولاتىن.
قازىرگى ۋاقىتتا اق ءۇي سايتىنىڭ ميني-ويىندار بولىمىندە تاعى ءتورت ويىن قالعان. ولاردىڭ قاتارىندا 2013 جىلى تانىمال بولعان Flappy Bird ويىنىنىڭ كوشىرمەسى — «Flappy Bill» بار. بۇل ويىندا ويىنشى قىران قۇستى باسقارىپ، ۇلتتىق اللەياداعى ەسكەرتكىشتەردەن ۇشىپ ءوتۋى كەرەك. سونداي-اق، Rio Run ويىنىندا ويىنشىعا وزەن بويىنداعى شەكارانى كۇزەتۋ تاپسىرىلادى، بۇل ويىن كلاسسيكالىق Snake ويىنىن ەسكە تۇسىرەدى.