وتكەن تاۋلىكتە اقمولا وبلىسىندا قۇرعاق وسىمدىكتەردىڭ سەگىز جانۋ وشاعى جويىلدى. ەرەيمەنتاۋ، اقكول، شورتاندى جانە بۋلاندى اۋداندارىندا، سونداي-اق ستەپنوگورسك قالاسىندا ءورت ءسوندىرۋ جۇمىستارى جالعاسۋدا، دەپ حابارلايدى infohub.kz.
الدىن الا دەرەكتەر بويىنشا، ورتتەردىڭ كوبى نايزاعاي سوعۋىنان پايدا بولعان. ورتپەن كۇرەسكە قۇتقارۋشىلار، جەرگىلىكتى اتقارۋشى ورگاندار قىزمەتكەرلەرى جانە باسقا دا سالالىق مەكەمەلەر جۇمىلدىرىلدى. قول جەتپەيتىن اۋدانداردا توتەنشە جاعدايلار مينيسترلىگىنىڭ اۆياسياسى قولدانىلىپ، جالىننىڭ تارالۋىن تەجەۋگە كومەكتەسۋدە.
جاعداي ۆەدومستۆونىڭ ەرەكشە باقىلاۋىندا، ورىنداردا جەدەل شتابتار قۇرىلعان.
— بارلىق ورتتەردىڭ جالپى اۋدانى شامامەن مىڭ گەكتاردى قۇرادى. ابىگەرگە سالىنباي، تەك رەسمي دەرەككوزدەرگە سەنۋ قاجەت. زارداپ شەككەندەر مەن قۇربان بولعاندار جوق. ەلدى مەكەندەرگە ەشقانداي ءقاۋىپ تونبەدى، — دەدى اقمولا وبلىسى تجد رەسمي وكىلى ەرسايىن قويشىبايەۆ.