اقمولا وبلىسىندا التىن وڭدەيتىن جاسىل سەح انىقتالدى. ارنايى وپەراسيا بەينەجازباعا ءتۇسىرىلدى. كۇدىكتى ۇيىمداستىرۋشى قاماۋعا الىندى، دەپ حابارلايدى infohub.kz قارجى مونيتورينگى اگەنتتىگىنە (قما) سىلتەمە جاساپ.
ۆەدومستۆونىڭ رەسمي Telegram-ارناسىندا حابارلانعانداي، اقمولا وبلىسى بويىنشا قما دەپارتامەنتى پروكۋراتۋرانىڭ ۇيلەستىرۋىمەن شورتاندى اۋدانىندا باعالى مەتالداردى زاڭسىز وندىرگەن دەگەن كۇدىككە ىلىنگەن ادامدار توبىنىڭ ارەكەتىن توقتاتتى.
جەدەل-ىزدەستىرۋ ءىس-شارالارى بارىسىندا التىن كەنىن وڭدەۋ جانە باعالى مەتالداردى الۋ ءۇشىن جابدىقتالعان جاسىل سەح تابىلدى. كەندى ۇساقتاۋ جانە بالقىتۋ قۇرالدارى، 446 گرامم سالماقتاعى التىن قۇيماسى، 4 توننا التىن كەنى، 6 كگ سىناپ، سونداي-اق 2 ميلليون تەڭگەدەن استام قاراجات پەن 8 مىڭ اقش دوللارى تاركىلەندى. ءتىنتۋ كەزىندە ءوق-دارى جانە اتىس قارۋى دا تابىلدى.
قازىرگى ۋاقىتتا زاڭسىز ارەكەتكە قاتىسى بار بارلىق ادامدار، سونداي-اق زاڭسىز وندىرىلگەن باعالى مەتالداردىڭ كولەمى انىقتالۋدا.
كۇدىكتى ۇيىمداستىرۋشى قاماۋعا الىندى. تەرگەۋ جالعاسۋدا.