اقمولا وبلىسىندا سوت قاۋىپسىزدىك ەرەجەلەرىن ساقتاماۋ سالدارىنان ادام ولىمىنە اكەپ سوققان ايەلگە ۇكىم شىعاردى. اناسى بالاسىن ەمىزىپ وتىرىپ ۇيىقتاپ قالعان سوڭ، نارەستە تۇنشىعىپ قازا تاپقان، دەپ حابارلايدى infohub.kz سايتى.
اقمولا وبلىسى سوتتارىنىڭ رەسمي Telegram-ارناسىندا ءمالىم بولعانداي، اقكول اۋداندىق سوتى قىلمىستىق كودەكستىڭ 104-بابىنىڭ 1-بولىگىمەن (ابايسىزدا ادام ولىمىنە اكەلۋ) ايىپتالعان ايەلگە قاتىستى قىلمىستىق ءىستى قارادى.
سوت انىقتاعانداي، ايەل قوناقتا ىشىمدىك ءىشىپ، ۇيىنە ماس كۇيىندە كەلىپ، تۇندە بالاسىن ەمىزىپ وتىرىپ ۇيىقتاپ كەتكەن. ويانعان سوڭ، بالاسىنىڭ تىرشىلىك بەلگىسى جوق ەكەنىن بايقاعان. شاقىرۋ بويىنشا كەلگەن جەدەل جاردەم نارەستەنىڭ تۇنشىعىپ قازا تاپقانىن راستادى.
ءىس سوتقا كىنانى مويىنداۋ تۋرالى پروسەسسۋالدىق كەلىسىم تۇرىندە ءتۇستى. پروكۋرور سوتتالۋشىعا باس بوستاندىعىن شەكتەۋ جازاسىن تاعايىنداۋدى سۇرادى. قىلمىستىق كودەكستىڭ 104-بابىنىڭ 1-بولىگىنىڭ سانكسياسى 3 جىلعا دەيىنگى مەرزىمگە باس بوستاندىعىن شەكتەۋ نە سول مەرزىمگە باس بوستاندىعىنان ايىرۋ جازاسىن كوزدەيدى. جازا تاعايىنداۋ كەزىندە سوت جەڭىلدەتەتىن ءمان-جاي رەتىندە شىن جۇرەكتەن وكىنۋىن، اۋىرلاتاتىن ءمان-جاي رەتىندە قىلمىستىڭ ماس كۇيىندە جاسالعانىن ەسكەردى.
سوت ۇكىمىمەن وعان پروباسيالىق باقىلاۋ بەلگىلەنە وتىرىپ، 1 جىل 6 اي باس بوستاندىعىن شەكتەۋ جازاسى تاعايىندالدى. سوت ۇكىمى زاڭدى كۇشىنە ەنگەن جوق.