اقمولا وبلىسىنىڭ پوليسەيلەرى مەتالل قابىلداۋ پۋنكتىنەن اقشا سالىنعان سەيفتىڭ ۇرلانعانىن اشتى. الايدا كۇدىكتى ۇستالعانشا ۇرلانعان قاراجات تولىق جۇمسالىپ كەتكەن، دەپ حابارلايدى infohub.kz سايتى.
وبلىستىق پوليسيا دەپارتامەنتىنىڭ ناقتىلاۋىنشا، قىلمىس 6 قىركۇيەككە قاراعان ءتۇنى جاسالعان. قۇقىق قورعاۋ ورگاندارىنا مەتالل قابىلداۋمەن اينالىساتىن كاسىپورىن اۋماعىنان اقشا سالىنعان سەيف ۇرلانعانى تۋرالى حابارلاما كەلىپ تۇسكەن.
وسى دەرەك بويىنشا پوليسەيلەر سوتقا دەيىنگى تەرگەپ-تەكسەرۋ باستاپ، قاجەتتى جەدەل-تەرگەۋ شارالارىنىڭ كەشەنىن جۇرگىزدى.
تەرگەۋ بارىسىندا وقيعا الدىندا كاسىپورىن قىزمەتكەرلەرى ادەتتەگىدەي اقشانى سەيفكە سالىپ، ءۇي-جايدى جاۋىپ كەتكەنى انىقتالدى. كەلەسى كۇنى ولار سەيفتىڭ جوق ەكەنىن بايقاپ، دەرەۋ پوليسياعا جۇگىنگەن.
تەرگەۋ اياسىندا ءتارتىپ ساقشىلارى وقيعا ورنىنىڭ ماڭىنا ورناتىلعان بەينەباقىلاۋ كامەرالارىنىڭ جازبالارىن زەرتتەپ، اۋماقتى قاراپ شىقتى، ىزدەر مەن ساۋساق ىزدەرىن الىپ، كاسىپورىن قىزمەتكەرلەرىنەن جاۋاپ الدى.
جۇرگىزىلگەن شارالاردىڭ ناتيجەسىندە كۇدىكتىنىڭ جەكە باسى انىقتالدى. ول 1978 جىلى تۋعان ەر ادام بولىپ شىقتى. تەرگەۋ ارەكەتتەرى بارىسىندا ول كىناسىن مويىندادى.
الدىن الا دەرەكتەرگە قاراعاندا، تۇندە ەر ادام جابىق كاسىپورىنعا كەزدەيسوق كوز ءتۇسىرىپ، تەرەزەدەن ىشكە كىرۋدى ۇيعارعان. ءۇي-جايدا ءجۇرىپ، ول سەيفتى ۇرلاعان. كەيىن قىلمىسكەر ونى لوممەن اشىپ، ۇرلانعان اقشانى جەكە قاجەتتىلىكتەرىنە جۇمساعان.
قازىرگى تاڭدا پوليسەيلەر كۇدىكتىنىڭ باسقا دا وسىعان ۇقساس قىلمىستارعا قاتىسىن تەكسەرىپ جاتىر.