اقمولا وبلىسىندا پوليسەيلەر ۇرلانعان موتوسيكلدى قۋىپ، 21 جاستاعى استانا تۇرعىنىن ۇستادى. بۇل تۋرالى infohub.kz سايتى حابارلايدى.
اقمولا وبلىسى پوليسيا دەپارتامەنتىنىڭ مالىمەتىنشە، 13 قىركۇيەكتە 102 ارنايى جەلىسىنە قالا تۇرعىنىنان Zuumاv ماركالى موتوسيكلىن ۇرلاۋ تۋرالى ارىز تۇسكەن.
ارىز يەسىنىڭ ايتۋىنشا، ساعات 11:50 شاماسىندا ءۇيىنىڭ جانىندا بولعان بەلگىسىز ەر ادام كولىك قۇرالىن يەمدەنىپ، قاشىپ كەتكەن.
«جەدەل باسقارۋ ورتالىعىنىڭ ينسپەكتورلارى حابارلامانى دەرەۋ وڭدەي باستادى. بەينەباقىلاۋ كامەرالارىنىڭ جازبالارىن زەردەلەي كەلە، پوليسەيلەر كۇدىكتىنىڭ قوزعالىس باعىتىن انىقتادى. ول استاناعا قاراي بەت العانى بەلگىلى بولدى. اقپارات پاترۋلدىك پوليسيا قىزمەتكەرلەرىنە جەدەل جەتكىزىلدى»، — دەدى پوليسيادا.
كوپ ۇزاماي پاترۋلدىكتەر استانا — پەتروپاۆل اۆتوجولىندا باعدارعا سايكەس كەلەتىن موتوسيكلدى تاپقانى حابارلاندى. ساعات 12:12 شاماسىندا كولىك قۇرالى تراسسانىڭ 197-شاقىرىمىندا بايقالعان. قۋعىننان كەيىن موتوسيكلدى 170-شاقىرىمدا توقتاتىپ، كۇدىكتىنى ۇستاۋ مۇمكىن بولدى.
اقمولا وبلىسى پد پاترۋلدىك پوليسيا باتالونىنىڭ 2-ۆزۆودى قىزمەتىنىڭ اعا ينسپەكتورى، پوليسيا كاپيتانى ەربول دۇيسەنتايدىڭ ايتۋىنشا، پوليسەيلەر جولدا ءقاۋىپتى جاعداي تۋعىزباۋعا جانە جول-كولىك وقيعاسىن بولدىرماۋعا تىرىسقان.
«ءبىز جكو-عا جول بەرمەۋ جانە باسقا جول قوزعالىسىنا قاتىسۋشىلاردى قاۋىپكە تىكپەۋ ءۇشىن بارىنشا ساقتىقپەن ارەكەت ەتۋگە تىرىستىق. سوندىقتان ۇستاۋ موتوسيكل تابىلعان جەردەن ايتارلىقتاي قاشىقتىقتا جۇزەگە استى»، — دەپ اتاپ ءوتتى پوليسيا كاپيتانى.
تەكسەرۋ بارىسىندا ۇستالعان ادامنىڭ استانا قالاسىنىڭ 21 جاستاعى تۇرعىنى ەكەنى انىقتالدى.
«الدىن الا دەرەكتەر بويىنشا، جاس جىگىت موتوسيكلدى ساتىپ الۋ ءۇشىن كورىپ كەتكەن، الايدا ساتىپ الۋعا اقشاسى بولماعان. يەسى وعان موتوسيكلدى تەۋىپ كورۋگە رۇقسات بەرگەن سوڭ، جاس جىگىت كولىك قۇرالىن يەمدەنىپ، قاشىپ كەتۋدى شەشكەن»، — دەدى پوليسيادا.
وسى فاكتى بويىنشا پوليسەيلەر ۇرلىق بويىنشا سوتقا دەيىنگى تەرگەپ-تەكسەرۋ باستادى. قازىرگى تاڭدا قاجەتتى تەرگەۋ ارەكەتتەرى جۇرگىزىلۋدە، ولاردىڭ ناتيجەسى بويىنشا كۇدىكتىنىڭ ارەكەتتەرىنە ءتيىستى قۇقىقتىق باعا بەرىلەدى.