وتكەن تاۋلىكتە اقمولا وبلىسىندا بىردەن التى تابيعي ءورت بولىپ، ولار ءبىرجان سال، سەلينوگراد، اتباسار، اقكول، شورتاندى جانە جاقسى اۋداندارىنىڭ اۋماعىن شارپىدى. جالپى الاڭى 67 گەكتار قۇرعاق ءشوپتى قامتىعان ورتتەر تۋرالى infohub.kz سايتى حابارلايدى.
قۇتقارۋشىلار مەن ورمانشىلار ورتكە جەدەل ارەكەت ەتىپ، باستى ماقسات — جالىننىڭ ەلدى مەكەندەرگە تارالۋىنا جول بەرمەۋ بولدى. سوندىرۋگە تجد بولىمشەلەرى، جەرگىلىكتى اكىمدىكتەر، سونداي-اق مارينوۆكا اۋىلىنىڭ «اۋىل قۇتقارۋشىلارى»، «ستەپنوگورسك» ورمان شارۋاشىلىعى جانە «كەنەس» ورمان شارۋاشىلىعى مەكەمەسىنىڭ كۇشتەرى جۇمىلدىرىلدى.
ۇيلەسىمدى ءىس-قيمىلدىڭ ارقاسىندا بارلىق ءورت وشاقتارى جويىلىپ، تۇرعىندار مەن ينفراقۇرىلىمعا ەشقانداي ءقاۋىپ تونگەن جوق.
الدىن الا مالىمەت بويىنشا، ءورتتىڭ سەبەبى — وتپەن ابايسىز قاراۋ. وسىعان بايلانىستى اقمولا وبلىسى تجد تۇرعىندار مەن قوناقتاردى ءورت قاۋىپسىزدىگى ەرەجەلەرىن قاتاڭ ساقتاۋعا شاقىرىپ، توتەنشە جاعداي تۋىنداعاندا 101 نەمەسە 112 نومىرلەرىنە دەرەۋ حابارلاۋ قاجەتتىگىن ەسكەرتەدى.
بۇعان دەيىن شىعىس قازاقستان وبلىسىنداعى ورمان ءورتىن تىكۇشاقپەن 100 رەت سۋ توگىپ قانا وقشاۋلاۋ مۇمكىن بولعانى حابارلانعان. سونداي-اق ەكولوگيا مينيسترلىگى ءبىر اپتا ىشىندە 50-گە جۋىق ورمان ءورتى بولعانىن، ولاردىڭ بارلىعى ۋاقىتىلى وقشاۋلانىپ، جويىلعانىن اتاپ وتكەن.