اقمولا وبلىسىنىڭ زەرەندى اۋداندىق سوتىندا ىسىراپ پەن الاياقتىق جاسادى دەپ ايىپتالعان جىلقىشىعا قاتىستى قىلمىستىق ءىس قارالدى. كەلتىرىلگەن شىعىننىڭ جالپى سوماسى 70 ملن تەڭگەدەن استى، دەپ حابارلايدى infohub.kz سايتى.
اقمولا وبلىسى سوتتارىنىڭ رەسمي Telegram-ارناسىندا جازىلعانداي، ەر ادام قىلمىستىق كودەكستىڭ 189-بابى 3-بولىگىنىڭ 1 جانە 3-تارماقتارى بويىنشا — بىرنەشە رەت جانە ءىرى مولشەردە بوتەننىڭ مۇلكىن ىسىراپ ەتۋ جانە جىمقىرۋ، سونداي-اق 190-بابى 3-بولىگىنىڭ 3-تارماعى بويىنشا — الاياقتىق جاسادى دەپ سوت الدىندا جاۋاپ بەردى.
سوت انىقتاعانداي، سوتتالۋشى جىلقىشى بولىپ جۇمىس ىستەپ، 34 ازاماتپەن ولاردىڭ جىلقىلارىن اقىلى جايىلىمعا قويۋ تۋرالى اۋىزشا كەلىسىم جاساسقان. ول مالدىڭ ساقتالۋىن قامتاماسىز ەتۋ مىندەتتەمەسىن وزىنە الىپ، وزىنە سەنىپ تاپسىرىلعان م ۇلىك ءۇشىن ماتەريالدىق جاۋاپكەرشىلىك كوتەرگەن.
2021–2025 جىلدار ارالىعىندا 34 جابىرلەنۋشىگە تيەسىلى 150 باس مال — بيە، پىشتىرىلگەن ايعىر، ايعىر، ق ۇلىن، سونداي-اق 10 باس ۇساق مال ىسىراپ ەتىلگەن. جوعالعان مالدى جاسىرۋ ءۇشىن ەر ادام ءبىر يەسىنىڭ جىلقىلارىن جوعالعاندارىنىڭ ورنىنا باسقا يەلەرىنە بەرىپ وتىرعان. كەلتىرىلگەن شىعىننىڭ جالپى سوماسى 70 ملن تەڭگەدەن اسقان.
سونىمەن قاتار سوتتالۋشى تابىنعا ايعىر ساتىپ الۋ دەگەن جالعان سىلتاۋمەن قاراجات جيناۋ جاريالاعان. جىلقى يەلەرى اقشا اۋدارعان، ول ونى ءوز قالاۋىنشا جۇمساپ، 5 جابىرلەنۋشىگە 40 مىڭ تەڭگە كولەمىندە ماتەريالدىق شىعىن كەلتىرگەن.
ەر ادامنىڭ كىناسى جابىرلەنۋشىلەر مەن كۋاگەرلەردىڭ ايعاقتارىمەن، قولحاتتارمەن، جىلقى جايىلىمى ءۇشىن تولەم تۇبىرتەكتەرىمەن، مالدىڭ ۆەتەرينارلىق پاسپورتتارىمەن، بەتپە-بەت سالىستىرۋلارمەن، جىلقىلاردى تانۋمەن جانە ءىستىڭ باسقا دا ماتەريالدارىمەن راستالدى.
جازا تاعايىنداۋ كەزىندە سوت سوتتالۋشىنىڭ اسىراۋىندا 4 كامەلەتكە تولماعان بالاسىنىڭ بولۋىن جەڭىلدەتەتىن ءمان-جاي رەتىندە ەسكەردى. «قازاقستان رەسپۋبليكاسىنىڭ جاڭا كونستيتۋسياسىن قابىلداۋعا بايلانىستى راقىمشىلىق تۋرالى» زاڭدى قولدانۋ ارقىلى ەر ادامعا 3 جىل 6 اي باس بوستاندىعىنان ايىرۋ جازاسى تاعايىندالدى.
جابىرلەنۋشىلەردىڭ ازاماتتىق تالاپتارى قاناعاتتاندىرىلدى: جالپى سوماسى 70 ملن تەڭگەدەن اساتىن ماتەريالدىق شىعىن ءوندىرىلدى. سوت اكتىسى زاڭدى كۇشىنە ەنگەن جوق.