اقمولا وبلىسىندا پوليسيا قىزمەتكەرلەرى مەملەكەتتىك تىركەۋ ءنومىرىن الىپ تاستاعان Infiniti كولىگىنىڭ جۇرگىزۋشىسىن ۇستادى. ول كامەرالارعا تۇسپەۋ جانە استانادان قوستانايعا تەزىرەك جەتۋ ءۇشىن وسىلاي جاساعان، دەپ حابارلايدى infohub.kz سايتى.
وبلىستىق پوليسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، وقيعا 18 قىركۇيەكتە ساعات 9:00 شاماسىندا بولعان. پاترۋلدىك پوليسيا باتالونىنىڭ قىزمەتكەرلەرى «قازاۆتوجول» وكىلدەرىمەن بىرلەسىپ، كامەرالار ارقىلى كولىگىنىڭ مەملەكەتتىك تىركەۋ ءنومىرىن الىپ تاستاعان جۇرگىزۋشىنى بايقاعان.
پوليسەيلەر Infiniti كولىگىن بىردەن باقىلاي باستادى. شامامەن ەكى ساعاتتان كەيىن كولىك استانا — پەتروپاۆل اۆتوجولىنىڭ 230-شاقىرىمىندا توقتاتىلدى.
تەكسەرۋ بارىسىندا جۇرگىزۋشىنىڭ ءجۇرىپ كەلە جاتقاندا ۇيالى تەلەفونمەن سويلەسكەنى جانە قاۋىپسىزدىك بەلدىگىن تاقپاعانى انىقتالدى.
«ەر ادام قۇقىقبۇزۋشىلىقتى جوققا شىعارمادى. ول كامەرالار ونىڭ كولىگىن تانىپ، ورتاشا جىلدامدىقتى اسىرعانىن تىركەمەۋى ءۇشىن ءنومىردى الىپ تاستاعانىن ءتۇسىندىردى. جۇرگىزۋشىنىڭ ايتۋىنشا، وسىلايشا استانادان قوستانايعا تەزىرەك جەتپەك بولعان»، — دەدى اقمولا وبلىسى پوليسيا دەپارتامەنتىندە.
ناتيجەسىندە جۇرگىزۋشىگە قاتىستى ءۇش قۇقىقبۇزۋشىلىق فاكتىسى بويىنشا اكىمشىلىك ماتەريالدار تولتىرىلدى. ونىمەن پروفيلاكتيكالىق اڭگىمە جۇرگىزىلدى.