اقش اكىمشىلىگى 200 مىڭعا جۋىق بوسقىن ۆيزاسىن جويۋدى جوسپارلاپ وتىر. بۇل تۋرالى Associated Press اگەنتتىگى مەملەكەتتىك دەپارتامەنت قۇجاتتارى مەن ەكى امەريكالىق شەنەۋنىككە سىلتەمە جاساپ حابارلادى.
دونالد ترامپ اكىمشىلىگى دۇيسەنبى كۇنى اقش-قا قىسقا مەرزىمدى كەلۋشى رەتىندە كىرىپ، كەيىن تۇراقتى تۇرۋ ءۇشىن بوسقىن مارتەبەسىن سۇراعان شەتەلدىكتەردىڭ يمميگرانتتىق ەمەس ۆيزالارىن جويۋدى جوسپارلايتىنىن مالىمدەدى. بۇل — يمميگراسيانى قاتاڭداتۋ بويىنشا كەڭ اۋقىمدى شارالاردىڭ سوڭعىسى.
مەملەكەتتىك دەپارتامەنت وكىلىنىڭ ايتۋىنشا، ولار ىشكى قاۋىپسىزدىك دەپارتامەنتىمەن بىرلەسىپ، «اقش-قا قىسقا مەرزىمدى كەلۋشى رەتىندە كەلگەن، ءبىراق تۇراقتى تۇرۋ ءۇشىن بوسقىن مارتەبەسىن سۇراعان شەتەلدىكتەردىڭ يمميگرانتتىق ەمەس ۆيزالارىن انىقتاپ، جويۋدى» ۇيلەستىرۋدە.
مەملەكەتتىك دەپارتامەنت بۇل پروسەستە قانشا ۆيزانىڭ جويىلاتىنىن ناقتى ايتپادى. الايدا Associated Press مالىمەتىنشە، بيزنەس جانە تۋريزم ۆيزالارىنىڭ 200 مىڭعا دەيىن جويىلۋى مۇمكىن. بۇل جۇزەگە اسسا، اقش تاريحىنداعى ەڭ ءىرى جاپپاي ۆيزا جويۋ شاراسى بولماق.
Associated Press حابارلاۋىنشا، مەملەكەتتىك دەپارتامەنت 2016-2026 جىلدار ارالىعىندا بەرىلگەن B1 جانە B2 ۆيزالارىن جويادى. بۇل ۆيزالار بيزنەس جانە تۋريزم ماقساتىندا بەرىلەدى. ولاردىڭ يەلەرى بوسقىن مارتەبەسىن سۇراعان نەمەسە ءقازىر سۇراپ جاتقاندار.
ۆيزالاردىڭ جويىلۋى دەرەۋ دەپورتاسياعا اكەلمەيدى. كوپشىلىگىنىڭ بوسقىن ءىسى قارالىپ جاتقاندار قايتا ساناتتالادى، ءبىراق بيزنەس نەمەسە تۋريزم ساناتىنان ايىرىلادى.
دۇيسەنبى كۇنى اقش مەملەكەتتىك حاتشىسىنىڭ ورىنباسارى كريستوفەر لانداۋ X الەۋمەتتىك جەلىسىندە امەريكالىق يمميگراسيا جۇيەسى «ۇزاق ۋاقىت بويى نەگىزسىز بوسقىن وتىنىمدەرىمەن تولىپ كەتكەنىن» جازدى.
مەملەكەتتىك دەپارتامەنت وسى ايدىڭ باسىندا ترامپ اكىمشىلىگى كەزىندە 175 مىڭنان استام شەتەلدىك ازاماتتىڭ ۆيزاسى جويىلعانىن حابارلاعان.
اقش پرەزيدەنتى يمميگراسيانى قاتاڭداتۋ شارالارىن جۇرگىزىپ جاتىر. وعان ۆيزالار مەن گرين-كارتالاردى جويۋ جانە اگرەسسيۆتى دەپورتاسيا ناۋقانى كىرەدى. ونىڭ ايتۋىنشا، بۇل شارالار ىشكى قاۋىپسىزدىكتى جاقسارتۋعا باعىتتالعان.
قۇقىق قورعاۋشىلار بۇل شارالار ءسوز بوستاندىعى مەن زاڭدى پروسەس قۇقىقتارىن بۇزىپ، اسىرەسە ەتنيكالىق ازشىلىقتار ءۇشىن ءقاۋىپتى ورتا تۋعىزاتىنىن ايتادى. ولار ناسىلدىك پروفيلدەۋ ماسەلەسىن كوتەرىپ وتىر.
ترامپ 2024 جىلى زاڭسىز يمميگراسيانى توقتاتۋ ۋادەسىمەن سايلاۋعا تۇسكەن. الايدا ونىڭ اكىمشىلىگى زاڭدى يمميگراسيانى دا قيىنداتىپ جاتىر. مىسالى، كەيبىر جۇمىس ۆيزالارىنا ءوتىنىش بەرۋشىلەر ءۇشىن جاڭا جانە قىمبات الىمدار ەنگىزىلدى. ۇكىمەتتىڭ بۇل شارالارى سوتتا داۋلانۋدا.