امەريكا قۇراما شتاتتارىنىڭ قارۋلى كۇشتەرى تەك جەرگە جاقىن وربيتادا عانا ەمەس، اي مەن ونىڭ اينالاسىندا دا سوعىس جۇرگىزۋگە دايىن بولۋى كەرەك. بۇل تۋرالى بىرىككەن شتاب باستىقتارى كوميتەتىنىڭ ءتوراعاسى گەنەرال دەن كەين مالىمدەدى، دەپ حابارلايدى infohub.kz سايتى.
ونىڭ ايتۋىنشا، اقش XXI عاسىرداعى سوعىستاردى «اي مەن ونىڭ اينالاسىندا» جۇرگىزۋگە جانە جەڭۋگە دايىن بولۋى ءتيىس. گەنەرال بۇل مالىمدەمەسىن مەريلەند شتاتىندا وتكەن اۆياسيا، عارىش جانە كيبەرقاۋىپسىزدىك ماسەلەلەرىنە ارنالعان كونفەرەنسيادا جاسادى.
«اقش عارىش كۇشتەرى عارىشتا ءسوزسىز باسىمدىقتى قامتاماسىز ەتىپ، سونداي-اق بىرىككەن كۇشتەرگە عارىشتا جەڭىسكە جەتۋ ءۇشىن قاجەتتى جەلىلەردى، عارىش سالاسىنداعى احۋالدان حاباردار بولۋدى جانە اقپاراتتىق باسىمدىقتى قولداۋى كەرەك — ءقازىر دە، بولاشاقتا دا»، — دەپ كەلتىرەدى ونىڭ ءسوزىن The Washington Times.
بىرىككەن شتاب باستىقتارى كوميتەتىنىڭ ءتوراعاسى سپۋتنيكتەر ورنالاسقان عارىش كەڭىستىگىندەگى ۇستەمدىك قارۋلى كۇشتەردىڭ بۇكىل الەم بويىنشا بايلانىس ۇستاۋ جانە ارەكەت ەتۋ قابىلەتى ءۇشىن وتە ماڭىزدى ەكەنىن اتاپ ءوتتى.
ايتا كەتەيىك، بىرنەشە كۇن بۇرىن اقش اسكەري-اۋە كۇشتەرىنىڭ ءمينيسترى تروي مەينك شتاتتاردىڭ ەندى وربيتادا ورنالاستىرىلعان عارىش قارۋى بار ەكەنىن مالىمدەگەن بولاتىن. سونىمەن قاتار، اقش بولاشاقتا Golden Dome زىمىرانعا قارسى قورعانىس جۇيەسىنىڭ بولىگى بولۋى ءتيىس عارىش زىمىراندارىنىڭ جەلىسىن ازىرلەپ جاتقانى بەلگىلى بولدى.