ۆاشينگتون مەن تەگەران اتىستى توقتاتۋدى كەلىسكەن، ول ورمۋز بۇعازىندا ەركىن ءجۇزۋدى قامتيدى، دەپ حابارلايدى infohub.kz سايتى.
پاكىستاندىق اسكەري جانە يران قاۋىپسىزدىك ورگاندارىنداعى دەرەككوزدەردىڭ مالىمەتىنشە، اتىستى توقتاتۋ تۋرالى رەسمي تۇردە جاقىن كۇندەرى جاريالانۋى مۇمكىن. ودان كەيىن تاراپتار كەلىسسوزدەر مەن تەحنيكالىق كونسۋلتاسيالاردىڭ بىرنەشە راۋندىن وتكىزۋدى جوسپارلاپ وتىر.
اقش پەن يران بيلىگى ازىرگە كەلىسىمگە قول جەتكىزىلگەنىن رەسمي راستاعان جوق.
بۇعان دەيىن وماننىڭ سىرتقى ىستەر ءمينيسترى بادر ءال-بۋسايدي يران تاراپىمەن كەلىسسوزدەردىڭ ىلگەرىلەگەنىن حابارلاعان ەدى. ول جاقىن ارادا ورمۋز بۇعازى ارقىلى كەمەلەردىڭ ءقاۋىپسىز وتۋىنە ارنالعان ۋاقىتشا ءدالىز قۇرۋ تۋرالى جاريالانادى دەگەن ءۇمىت ءبىلدىردى. كەيىن تاراپتار ماسەلەنى تۇپكىلىكتى شەشۋدى كوزدەپ وتىر.
ماۋسىم ايىنىڭ ورتاسىندا اقش پەن يران بەيبىت كەلىسىم دايىنداۋ پروسەسىن باستاۋعا ءتيىس مەموراندۋمعا قول قويعان بولاتىن. بىرنەشە اپتادان كەيىن جاعداي قايتا ۋشىقتى. ۆاشينگتون تەگەراندى ورمۋز بۇعازىنداعى ساۋدا كەمەلەرىنە شابۋىل جاسادى دەپ ايىپتاپ، تاراپتار قايتادان سوققى الماستىرا باستادى.
سوڭعى اپتالاردا تاياۋ شىعىستاعى دەلدالدار اقش پەن يرانعا جاڭا كەلىسىمنىڭ شارتتارىن كەلىسۋگە كومەكتەسۋگە تىرىسۋدا. اقش پرەزيدەنتى دونالد ترامپ بۇعان دەيىن ۆاشينگتون تەگەرانمەن كەلىسسوزدەردى جالعاستىرىپ، ءبىر مەزگىلدە يسلام رەسپۋبليكاسىنا ەكونوميكالىق قىسىمدى كۇشەيتىپ جاتقانىن مالىمدەگەن.
امەريكا كوشباسشىسى سونداي-اق يرانعا قارسى ەكونوميكالىق وپەراسيا باستالعانىن جاريالاپ، وداقتاستاردى ەلدى وقشاۋلاۋعا قوسىلۋعا شاقىردى. يران سىرتقى ىستەر ءمينيسترى ابباس اراكچي ترامپتىڭ بۇل مالىمدەمەسىن اقش-تىڭ ىشكى پروبلەمالارىنان نازاردى باسقارۋ ارەكەتى دەپ اتادى.