اقش قارۋلى كۇشتەرى يرانداعى نىساندارعا ءبىرقاتار زىمىراندىق سوققى بەردى. حورموزگان جانە حۋزەستان پروۆينسيالارىندا بىرنەشە قالا زارداپ شەكتى. العاشقى مالىمەتتەر بويىنشا، ادام شىعىنى مەن قيراۋلار بولعان، دەپ حابارلايدى infohub.kz سايتى.
يران كوزدەرىنىڭ مالىمەتىنشە، ورمۋز بۇعازىنا كىرە بەرىستەگى جاعالاۋداعى سيريك قالاسى (حورموزگان پروۆينسياسى)، سونداي-اق حۋزەستان پروۆينسياسىنداعى وندىرىستىك ورتالىق احۆاز، رامشير جانە ەنديمەشك قالالارى اتقىلاۋعا ۇشىرادى. سوڭعىسىندا شەلەمچە يران-يراك شەكارا وتكەلىندەگى جولاۋشىلار تەرمينالىنا زىمىران ءتيدى. الدىن الا دەرەكتەر بويىنشا، ەكى ادام قازا تاۋىپ، ىزدەۋ-قۇتقارۋ جۇمىستارى ءجۇرىپ جاتىر. شەكارا وتكەلى ءالى كۇنگە دەيىن اشىق.
شيەلەنىستىڭ كۇشەيۋىنە بايلانىستى كۋۆەيت اسكەرى يران اۋماعىنان ۇشقىشسىز ۇشاقتاردىڭ شابۋىلىنا تويتارىس بەرۋ ءۇشىن اۋە قورعانىس جۇيەلەرىن ىسكە قوستى. كۋۆەيتتىڭ اۋە قورعانىسى اۋە نىساندارىن ءساتتى جويدى، تۇرعىندارعا قاۋىپسىزدىك شارالارىن ساقتاۋعا شاقىردى.
Axios باسىلىمىنىڭ مالىمەتىنشە، اقش پرەزيدەنتى جاقىن كۇندەرى يرانعا قارسى اسكەري وپەراسيانى ەداۋىر كەڭەيتۋ مۇمكىندىگىن قاراستىرىپ جاتىر. The Wall Street Journal حابارلاۋىنشا، اقش تاياۋ شىعىسقا ارنايى وپەراسيا كۇشتەرىن، جويعىش ۇشاقتار مەن قوسىمشا مەديسينالىق پەرسونالدى بەلسەندى تۇردە جىبەرۋدە. امەريكا مەن ۇلىبريتانياداعى بازالارداعى ستراتەگيالىق بومبالاۋشى ۇشاقتار جوعارى دايىندىق رەجيمىنە كوشىرىلدى. سونداي-اق ۆاشينگتون بومبالاۋدى كۇشەيتۋ، يراننىڭ ەنەرگەتيكا نىساندارىنا سوققى بەرۋ جانە ورمۋز بۇعازى ماڭىنداعى ارالداردى باسىپ الۋ ءۇشىن قۇرلىق اسكەرىن جىبەرۋ سەناريلەرىن قاراستىرۋدا.