اقش مەملەكەتتىك دەپارتامەنتى مالايزيانىڭ اقش-تاعى ەلشىسىن يزرايلگە قاتىستى ۇزاق جىلعى ساياساتىنا بايلانىستى شاقىرتتى. بۇل تۋرالى infohub.kz حابارلايدى.
مالايزيا سىرتقى ىستەر ءمينيسترى مۇحامماد حاسان بەيسەنبى كۇنى كەشكە ەلشى مۇحامماد شاحرۋل يكرام ياكۋبتىڭ اقش مەملەكەتتىك دەپارتامەنتىنە مالايزيانىڭ ءيزرايلدى تانىماۋ ساياساتىنىڭ جاڭا ەمەستىگىن جەتكىزگەنىن ايتتى. «بۇل ءاردايىم مالايزيانىڭ ساياساتى بولدى. ءبىزدىڭ يمميگراسيا ساياساتىمىز يزرايل مەملەكەتىن نەمەسە سيونيستىك رەجيمدى تانىمايدى. بۇل ءبىزدىڭ ۇزاق ۋاقىتتان بەرگى ۇستانىمىمىز»، — دەدى حاسان «بەرناما» اگەنتتىگىنە سىلتەمە جاساپ.
ونىڭ ايتۋىنشا، اقش پەن ءيزرايلدىڭ قوس ازاماتتىعى بار ادام مالايزياعا اقش پاسپورتىمەن كىرگەن. كەيىنگى تەكسەرۋدە ونىڭ يزرايل ازاماتتىعى دا بار ەكەنى انىقتالىپ، ونى ەلدەن كەتۋگە ءماجبۇر ەتكەن. مالايزيانىڭ يزرايلمەن ديپلوماتيالىق قارىم-قاتىناسى جوق ءارى پالەستينا حالقىنىڭ قۇقىقتارىن قولدايتىنىن، گازا مەن باسىپ الىنعان باتىس جاعالاۋداعى يزرايلدىك ارەكەتتەرگە قارسى ەكەنىن ءبىلدىرىپ كەلەدى.
بۇل وقيعاعا اقش ينۆەستورى بالاجي سرينيۆاسان نەگىزىن قالاعان «Network School» سيفرلىق كوشپەندىلەر قاۋىمداستىعى سەبەپ بولدى. الەۋمەتتىك جەلىلەردە بۇل مەكتەپكە يزرايلدەن قاتىسۋشىلار بار دەگەن اقپارات تاراعان سوڭ، تەكسەرۋ جۇرگىزىلدى. مالايزيا بيلىگى بارلىق قاتىسۋشىنىڭ جارامدى ساپار قۇجاتتارى بار ەكەنىن انىقتاسا دا، مەكتەپ سەيسەنبىدە جابىلدى.
كەيىن اقش-تىڭ سەگىز كونگرەسمەنى مەملەكەتتىك حاتشى ماركو رۋبيوعا حات جولداپ، مالايزيا پرەمەر-مينيسترى ءانۆار ءيبراھيمنىڭ ەلدەگى كەز كەلگەن يزرايل ازاماتتارىن باقىلاپ، دەرەۋ شىعارىپ جىبەرۋ جوسپارىنا نارازىلىق ءبىلدىردى. الايدا سارسەنبىدە يبراھيم اقش كونگرەسمەندەرىنىڭ قارسىلىعىنا قاراماستان، مالايزيا يزرايل ازاماتتارىنىڭ ەلگە كىرۋىنە تىيىم سالۋدى جالعاستىراتىنىن قايتالادى.
ءانۆار مالايزيانى پالەستينالىقتاردىڭ قۇقىقتارىن قورعاۋعا جانە گازاداعى «زورلىق-زومبىلىق، اگرەسسيا جانە ۇزدىكسىز ولتىرۋگە» قارسى تۇرۋعا بەرىلگەندىك باسشىلىققا الاتىنىن ايتتى. «بۇل ءبىزدى توقتاتپايدى. ولار ءقاۋىپ ءتوندىرۋى مۇمكىن، ءبىراق مەن مالايزيالىقتاردىڭ قۇقىقتارىن بەرىك قورعايمىن جانە ۇكىمەتتىڭ يزرايل ازاماتتارىن مالايزياعا كىرگىزبەۋ تۋرالى شەشىمىن قولدايمىن»، — دەدى ول.
اقش كونگرەسمەندەرى مەملەكەتتىك دەپارتامەنتتى كۋالا-لۋمپۋرمەن ەكونوميكالىق جانە قاۋىپسىزدىك بايلانىستارىن قايتا قاراۋعا شاقىردى. ولار 15 كۇن ىشىندە شەشىم وزگەرتىلمەسە، مالايزيالىق اسكەري قىزمەتكەرلەرگە اقش-تىڭ كاسىبي وقۋ باعدارلاماسىن قارجىلاندىرۋدى توقتاتۋدى ۇسىندى.