امەريكا قۇراما شتاتتارىنىڭ كاليفورنيا شتاتىندا New York Times گازەتىنىڭ 40 جاستاعى ينجەنەرلىك ديرەكتورى دجوناتان ماككينزي اتىپ ءولتىرىلدى. كۇدىكتى رەتىندە ونىڭ 77 جاستاعى قايىن اتا-ەنەسى شوۋيۋن چجان مەن شيلي چەن ۇستالدى، دەپ حابارلايدى infohub.kz سايتى.
پوليسيا مالىمەتىنشە، مارقۇم سەنبى كۇنى تۇستەن كەيىن سان-فرانسيسكودان شىعىسقا قاراي 56 شاقىرىم جەردەگى دۋبلين قالاسىنداعى اۆتوتۇراقتا بىرنەشە وق جاراقاتىمەن تابىلدى. ول گازەتتىڭ ويىن ويناۋشىلار تاجىريبەسى ءبولىمىنىڭ ينجەنەرلىك ديرەكتورى قىزمەتىن اتقارعان.
شوۋيۋن چجان مەن شيلي چەنگە ءبىرىنشى دارەجەلى كىسى ءولتىرۋ سياقتى بىرنەشە ايىپ تاعىلۋدا. ەرلى-زايىپتىلاردىڭ ادۆوكاتى بار-جوعى بەلگىسىز، ولار سارسەنبى كۇنى ايىپتاۋ قورىتىندىسىن رەسمي تۇردە تانىسۋ ءۇشىن سوتقا كەلۋى ءتيىس.
ماككينزيدىڭ قازاسىن New York Times باسىلىمى راستادى. ونىڭ دەنەسى بەيسەنبى كۇنى تۇستەن كەيىن ساعات 15:00-دە (گرينۆيچ ۋاقىتىمەن 23:00) دۋبلين سپورت الاڭىنىڭ سىرتىنان تابىلعان.
سان-فرانسيسكوداعى KGO-TV تەلەارناسىنا كۋاگەرلەر الدىمەن بىرنەشە وق دىبىسىن ەستىگەنىن، سودان كەيىن جەردە جاتقان ادامدى كورگەنىن ايتتى.
«مەن ول كىسىنىڭ جەرگە قۇلاعانىن كوردىم: باسى مەن كەۋدەسى قانعا بويالعان ەدى»، — دەدى كۋاگەر اسساد رازاۆي اتالعان تەلەارناعا. ونىڭ قىزى اكەسىنىڭ ەرلى-زايىپتىلاردى «بىرگە كەلە جاتقانىن، سودان كەيىن اتىس بولعان جەردەن ەشقانداي اسىعىسسىز كەتىپ بارا جاتقانىن» كورگەنىن قوستى.
ەرلى-زايىپتىلاردى وقيعا ورنىنان ءوتىپ بارا جاتقان پوليسيا قىزمەتكەرى بىرنەشە مينۋتتان كەيىن ۇستادى. كۋاگەردىڭ ايتۋىنشا، ولار شابۋىلدان كەيىن دە سول ماڭدا قالىپ قويعان.
پوليسيانىڭ مالىمەتىنشە، ماككينزي وقيعا ورنىندا قازا تاپتى. پوليسيا ونىڭ ءولتىرىلۋ سەبەبىن ازىرگە جاريالاعان جوق.
قارت جۇپ سانتا-ريتا تۇرمەسىندە ۇستالىپ وتىر. ولارعا سونداي-اق اۋىر قىلمىس جاساۋعا ءسوز بايلاسۋ، ابايسىزدىقپەن اتىس قارۋىن قاساقانا قولدانۋ جانە بالالاردىڭ قاۋىپسىزدىگىنە قاتەر ءتوندىرۋ ايىپتارى تاعىلۋدا.