امەريكانىڭ لۋيزيانا شتاتىندا بالىق اۋلاۋدىڭ ەرەكشە ءارى ءقاۋىپتى ءتۇرى – نۋدلينگ تانىمال بولا باستادى. مۇنداي اۋلاۋ كەزىندە بالىقشىلار قارماق پەن جەمنەن باس تارتىپ، ونىڭ ورنىنا ءوز قولدارى مەن اياقتارىن پايدالانىپ، الىپ سومداردى تارتادى، دەپ حابارلايدى inbusiness.kz سايتى.
Outside باسىلىمىنىڭ جازۋىنشا، نۋدلينگكە قاتىسۋشىلار اياق-قولدارىن سۋ استىنداعى ۇيالارعا باتىرادى، وندا بالىقتار ۋىلدىرىقتى كۇزەتەدى. ءدال وسى ساتتە سوم «جەمدى» ۇستاپ الادى، ال بالىقشى ونى سىرتقا شىعارۋعا تىرىسادى.
25 جاستاعى نۋدلەر رەممي بيردەننىڭ ايتۋىنشا، مۇنداي بالىق اۋلاۋ كەزىندە ادام ءىس جۇزىندە اڭشىلىق نىسانىنا اينالادى. «ءبىز كوك سومدى اۋلامايمىز، كەرىسىنشە، ول ءبىزدى اۋلايدى»، – دەدى ول. بالىقشىنىڭ قولدارى ءىرى بالىقتاردىڭ تىستەرىنەن كوپتەگەن تىرتىقتارمەن جابىلعان.
كاسىبي نۋدلەر ۆينني ۆوزنياك ەرەكشە تاجىريبەنى قالايتىندار ءۇشىن اقىلى بالىق اۋلاۋدى ۇيىمداستىرادى. قاتىسۋ قۇنى شامامەن 400 دوللار (31 مىڭ رۋبل شاماسىندا)، ال سۇرانىس سونشالىقتى جوعارى، وعان اي سايىن جۇزدەگەن ءوتىنىش كەلىپ تۇسەدى.
كليەنتتەر اراسىندا بۇرىن ەشقاشان بالىق اۋلاماعان ادامدار كەزدەسەدى. بىردە، مىسالى، مۇنداي اۋلاۋعا قىزدار كەشىن تويلاپ جۇرگەن توپ كەلدى. قاتىسۋشىلار العاشقى ارەكەتتە-اق ءىرى سومداردى ۇستاپ الدى.
نۋدلەرلەر اراسىنداعى باستى اڭىزداردىڭ ءبىرى – 63 جاستاعى سكيپپەر بايۆينس. ول بالا كەزىنەن قولمەن بالىق اۋلاي باستاعان. مانسابىندا سولتۇستىك امەريكادا 50 كەلىگە دەيىنگى، ال يسپانيادا 113 كەلىگە دەيىنگى سومداردى ۇستاعان.
مۇنداي كاسىپتىڭ ەرەكشەلىگىنە قاراماستان، ماماندار نۋدلينگ سومداردىڭ پوپۋلياسياسىنا ەلەۋلى ءقاۋىپ توندىرەدى دەپ سانامايدى. الايدا بالىقشىلاردىڭ وزدەرى ءۇشىن تاۋەكەل جوعارى بولىپ قالا بەرەدى: بالىقتىڭ ورنىنا سۋ استىنداعى ۇيالاردا ايماقتىڭ باتپاقتارىندا مەكەندەيتىن الليگاتورلار نەمەسە ۋلى جىلاندار بولۋى مۇمكىن.