امەريكا قۇراما شتاتتارى وربيتاعا ورنالاستىرىلعان عارىشتىق باقىلاۋ قارۋى بار ەكەنىن العاش رەت رەسمي تۇردە راستادى. بۇل تۋرالى اقش اسكەري-اۋە كۇشتەرىنىڭ ءمينيسترى تروي مەينك مالىمدەدى، دەپ حابارلايدى infohub.kz سايتى.
Defense One باسىلىمىنىڭ حابارلاۋىنشا، مالىمدەمە 14 قىركۇيەكتە مەريلەند شتاتىندا وتكەن Air، Space & Cyber كونفەرەنسياسىندا جاسالدى. DefenseScoop باسىلىمى اتاپ وتكەندەي، بۇل — پەنتاگون وكىلىنىڭ اقش-تىڭ تىكەلەي عارىش كەڭىستىگىندە ورنالاسقان قارۋى بارىن العاش رەت جاريا تۇردە مويىنداۋى.
«بۇگىن ءبىز قايدا پايدا بولسا دا، وزگەرمەلى قاۋىپ-قاتەرلەرگە دايىن بولۋدى جالعاستىرىپ كەلەمىز. سوندىقتان اقش-تىڭ ەندى وربيتاعا ورنالاستىرىلعان، بىرلەسكەن كۇشتەردى قارسىلاستىڭ دۇشپاندىق ارەكەتتەرىنەن قورعاي الاتىن عارىشتىق باقىلاۋ قارۋى بار»، — دەدى مەينك.
مينيستر ناقتى قانداي جۇيەلەر تۋرالى ايتىلىپ جاتقانىن، ولاردىڭ عارىشتا قانشاسى بار ەكەنىن جانە قانداي مۇمكىندىكتەرگە يە ەكەنىن ناقتىلامادى. Air & Space Forces Magazine دەرەگىنشە، مەينك ءسوز سوڭىندا تۇجىرىمنىڭ ادەيى جاسالعانىن جانە «وتە جاقسى ويلاستىرىلعانىن» اتاپ ءوتتى.
مالىمدەمە ساراپشىلار اراسىندا الاڭداۋشىلىق تۋدىردى. Secure World Foundation ۇيىمىنىڭ عارىش قاۋىپسىزدىگى جانە تۇراقتىلىعى جونىندەگى ديرەكتورى ۆيكتوريا سەمسون ۆاشينگتوننىڭ مويىنداۋى جۇڭگو مەن رەسەيدى وزدەرىنىڭ عارىشتىق قارۋلارى تۋرالى اشىق ايتۋعا يتەرمەلەۋى مۇمكىن دەپ بولجادى.
ونىڭ پىكىرىنشە، ءسوز سپۋتنيكتەردى فيزيكالىق تۇردە جويۋعا جانە عارىش قوقىسىن جاساۋعا قابىلەتتى كينەتيكالىق جۇيەلەر تۋرالى ەمەس بولۋى ىقتيمال. ساراپشى اقش وربيتاعا راديوەلەكتروندىق كۇرەس جانە سيگنالداردى باسۋ قۇرالدارىن ورنالاستىرعان بولۋى مۇمكىن دەپ جورامالدادى.
مەينك سونداي-اق قىركۇيەكتە قوزعالىستاعى اۋە نىساندارىن انىقتاۋعا ارنالعان سپۋتنيكتىك جۇيەنىڭ پروتوتيپتەرىن وربيتاعا شىعارۋ جوسپارلانىپ وتىرعانىن حابارلادى. سونىمەن قاتار، امەريكاندىق Golden Dome قارسى زىمىراندىق قورعانىس جۇيەسى ءۇشىن ازىرلەنىپ جاتقان عارىشتىق تۇتقىشتار ۇشۋعا دايىندىق ساتىسىنا جەتتى.