نيۋ-مەكسيكو شتاتىنىڭ سوتى Meta كومپانياسىنا (Facebook، Instagram جانە WhatsApp يەسى) جالپى سوماسى 942 ميلليون دوللار ايىپپۇل سالۋ تۋرالى شەشىم شىعاردى. سەبەپ — الەۋمەتتىك جەلى الگوريتمدەرىنىڭ بالالارعا كەلتىرەتىن زيانى جانە پايدالانۋشىلاردىڭ جاسىن تەكسەرۋدىڭ جەتكىلىكسىزدىگى، دەپ حابارلايدى infohub.kz.
سۋديا برايان بيدشەيد Meta-نى «قوعامعا ءقاۋىپتى» دەپ سيپاتتادى. كومپانيا ونىڭ الەۋمەتتىك جەلىلەرىنىڭ الگوريتمدەرى تاۋەلدىلىك تۋدىراتىنى ءۇشىن كىنالى دەپ تانىلدى. سوت Meta-نى بۇل جاعدايدى تۇزەتۋگە، سونداي-اق كامەلەتكە تولماعانداردىڭ جىنىستىق قاناۋىن بولدىرماۋ ءۇشىن جاس تەكسەرۋىن جاقسارتۋعا مىندەتتەدى.
7 تامىزدا سوت تەحنولوگيالىق الىپقا 567 ميلليون دوللار تولەۋدى تاپسىردى. بۇعان دەيىن، ناۋرىزدا، سول سوت كومپانياعا 375 ميلليون دوللار ايىپپۇل سالعان بولاتىن. سوندا القابيلەر Meta بالالاردىڭ پسيحيكالىق دەنساۋلىعىنا ادەيى زيان كەلتىرگەنىن جانە ولاردىڭ پلاتفورمالارىندا جىنىستىق قاناۋ تۋرالى اقپاراتتى جاسىرعانىن انىقتادى. Guardian تۇسىندىرگەندەي، بۇل ءبىر ءىستىڭ ەكى كەزەڭى، ال ايىپپۇلدىڭ جالپى سوماسى 942 ميلليون دوللاردى قۇرادى.
سۋديانىڭ ايتۋىنشا، قاراجاتتىڭ باسىم بولىگى نيۋ-مەكسيكونىڭ جاس تۇرعىندارىن ينتەرنەتكە تاۋەلدىلىكتەن ەمدەۋگە، قالعانى — بۇل ماسەلەنىڭ الدىن الۋعا جۇمسالادى.
Meta ەكى ايىپپۇلعا دا شاعىم ءتۇسىرۋدى جوسپارلاپ وتىر. كومپانيا جاسوسپىرىمدەردى ءقاۋىپتى كونتەنتتەن قورعاۋعا جەتكىلىكتى كۇش سالمايدى دەگەندى جوققا شىعارادى جانە سوتتىڭ بۇل مالىمدەمەسىنە داۋ ايتپاقشى.
نيۋ-مەكسيكو پروكۋراتۋراسىنىڭ تالاپ-ارىزى الەۋمەتتىك جەلىلەردىڭ بالالار دەنساۋلىعىنا زيان كەلتىرەتىنىن سوتتا دالەلدەگەن العاشقى ءساتتى ءىس بولدى. سوت سونداي-اق Meta-عا الەۋمەتتىك جەلىلەردى پايدالانۋعا شەكتەۋ ەنگىزۋدى تالاپ ەتتى — ايىنا 90 ساعاتتان اسپاۋى كەرەك.
بۇعان دەيىن WhatsApp پايدالانۋشىلارى الەم بويىنشا اككاۋنتتاردىڭ بۇعاتتالۋىنا شاعىمدانعانى حابارلانعان بولاتىن. اقاۋلىق قاجەتسىز كونتەنتتەن قورعايتىن اۆتوماتتاندىرىلعان جۇيەدەگى پروبلەمالارعا بايلانىستى بولدى.