2022 جىلى تۇرمەگە جابىلعان جانە دەنساۋلىعى وتە ناشار دەپ حابارلانعان بۇرىنعى امەريكالىق تەڭىز جاياۋ اسكەرى رەسەيدەن بوساتىلدى. ماسساچۋسەتس شتاتىنىڭ تۇرعىنى روبەرت گيلمان «گۋمانيتارلىق سەبەپتەرمەن» بوساتىلىپ، سەيسەنبى كۇنى اقش-قا باعىت العان ۇشاقتا ۆاشينگتونعا جەتكىزىلۋدە. بۇل تۋرالى رەسەي پرەزيدەنتى ۆلاديمير ءپۋتيننىڭ ارنايى وكىلى كيريلل دميترييەۆ مالىمدەدى، دەپ حابارلايدى infohub.kz سايتى.
ماسساچۋسەتس سەناتورى ەد ماركي الەۋمەتتىك جەلىدە گيلماننىڭ بوساتىلماس بۇرىن «تولىق كاتاتونيا جاعدايىندا» بولعانىن جانە «اۋىر پنەۆمونيامەن» كۇرەسىپ جاتقانىن جازدى. گيلمان 28 جاسىندا ماسكەۋگە بارا جاتقان پويىزدا ماساڭ كۇيدە پوليسەيدى تەپكەنى ءۇشىن قاماۋعا الىنعان ەدى.
«شامامەن 50 كۇن بۇرىن روبەرتكە ءديسسوسياتيۆتى ستۋپور دياگنوزى قويىلدى — بۇل ونىڭ سىرتقى اسەرگە جاۋاپ بەرمەي، قارىم-قاتىناس جاساي المايتىن جانە تاماق ىشە المايتىن جاعدايى»، — دەدى ماركي، گيلماننىڭ قازىرگى جاعدايى تۋرالى مالىمەت بەلگىسىز ەكەنىن قوسىپ.
Reuters اگەنتتىگىنىڭ حابارلاۋىنشا، گيلمان اقش-قا ورالعان كەزدە وعان بىرنەشە دارىگەر كومەك كورسەتكەن، ال امەريكالىق شەنەۋنىك «ول جاقسى جاعدايدا سياقتى» دەگەن. CBS Newsء-تىڭ حابارلاۋىنشا، ونىڭ وتباسى ونى تەحاستاعى اسكەري گوسپيتالدا كۇتىپ وتىر.
«پرەزيدەنت ترامپقا اعامنىڭ ءومىرىن ساقتاپ قالعانى ءۇشىن وتە ريزامىن. روبەرتتىڭ بۇگىن ءتىرى بولۋىنىڭ باسقا سەبەبى جوق — ترامپ بۇل ءىستى ەستىپ، ارەكەت ەتتى»، — دەدى ونىڭ اپكەسى لەكسي حادسون مالىمدەمەسىندە.