اقش-تا مەملەكەتتىك قىزمەتكەرلەرگە TikTok-تى جۇمىس قۇرىلعىلارىنا قايتا ورناتۋعا رۇقسات بەرىلدى. بۇل قوسىمشانىڭ مەنشىك قۇرىلىمى جاڭارتىلعاننان كەيىن مۇمكىن بولدى، دەپ حابارلايدى infohub.kz سايتى.
اقش باسقارۋ جانە بيۋدجەت باسقارماسى (OMB) مەملەكەتتىك قۇرىلعىلاردا TikTok-تى پايدالانۋعا تىيىم سالۋدى جوياتىن مەموراندۋم شىعاردى. شەشىم اقش ادىلەت مينيسترلىگىنىڭ ساراپتامالىق قورىتىندىسىنا نەگىزدەلگەن، وعان سايكەس 2022 جىلعى زاڭ ەندى قىسقا بەينەروليكتەرگە ارنالعان تانىمال قىزمەتكە قولدانىلمايدى.
بيلىكتىڭ ۇستانىمىنىڭ وزگەرۋىنە پلاتفورمانىڭ مەنشىك قۇرىلىمىنداعى وزگەرىستەر سەبەپ بولدى. قوسىمشانىڭ امەريكاندىق نۇسقاسىن ەندى Oracle كومپانياسى مەن Silver Lake قورى كىرەتىن ينۆەستورلار كونسورسيۋمى باقىلايتىن TikTok USDS Joint Venture نىسانى باسقارادى. سونىمەن قاتار، قىتايلىق ByteDance كومپانياسى اكسيالاردىڭ تەك 19،9 پايىزىن ساقتاپ قالدى. بۇدان باسقا، سەرۆيس اقش پايدالانۋشىلارىنا ارنالعان ۇسىنىس الگوريتمىن جاڭارتتى.
كەيبىر امەريكاندىق ۆەدومستۆولار الەۋمەتتىك جەلىدە رەسمي اككاۋنتتار قۇرا باستادى. ولاردىڭ قاتارىندا اقش كولىك مينيسترلىگى، اقش قارجى مينيسترلىگى جانە اقش دەنساۋلىق ساقتاۋ جانە حالىققا قىزمەت كورسەتۋ مينيسترلىگى بار. ەسكە سالايىق، 2022 جىلى قوسىمشا ۇلتتىق قاۋىپسىزدىككە قاتىستى الاڭداۋشىلىققا بايلانىستى تىيىم سالىنعان بولاتىن.