امەريكا قۇراما شتاتتارى ۋكراينانى كاسپي قۇبىر كونسورسيۋمىنىڭ (كتك) ماڭىنداعى كەمەلەرگە شابۋىل جاساۋدان باس تارتۋعا كوندىردى. بۇل كونسورسيۋم قازاقستاندىق مۇنايدىڭ الەمدىك نارىققا ەكسپورتى ءۇشىن ماڭىزدى مانگە يە، دەپ حابارلايدى infohub.kz سايتى.
ربك Bloomberg-كە سىلتەمە جاساپ حابارلاعانداي، اقش اكىمشىلىگىنىڭ وكىلدەرى ۋكراينا باسشىلىعىمەن كەزدەسۋ وتكىزىپ، وندا كتك تەڭىز تەرمينالى ماڭىنداعى كەمەلەرگە جاسالعان شابۋىلدار سەرياسىنا قاتىستى جاعداي تالقىلاندى. اتى اتالماعان امەريكالىق شەنەۋنىكتىڭ ايتۋىنشا، ۋكراين تاراپىن قارا تەڭىزدەگى مۇناي تانكەرلەرى مەن ينفراقۇرىلىم نىساندارىنا، ياعني قازاقستاندىق مۇناي ەكسپورتى ءۇشىن ماڭىزدى نىساندارعا شابۋىل جاساۋدان باس تارتۋعا كوندىرۋ مۇمكىن بولعان.
ماتەريالدا كييەۆ كەمە يەلەرى اقپارات بەرە الاتىن جانە قارا تەڭىز ارقىلى ءقاۋىپسىز وتە الاتىن بايلانىس پۋنكتتەرىن قۇرعانى اتاپ وتىلگەن.
ەسكە سالايىق، سوڭعى شابۋىل 30 شىلدەدە بولعان ەدى. كتك ءباسپاسوز قىزمەتى سول كەزدە تەڭىز تەرمينالىنىڭ اكۆاتورياسىندا تانكەرگە جاسالعان شابۋىل تۋرالى مالىمدەمە جاساپ، ونى «تەرروريستىك» دەپ اتاعان. مارشالل ارالدارىنىڭ تۋىن كوتەرگەن Niffos Sifnos تانكەرى زارداپ شەككەنى حابارلانعان. جۇك جونەلتۋشى — «تەڭىزشەۆرويل» ج ش س («شەۆرون» كومپانياسى، قازاقستان). تانكەر سول كەزدە الىس ورنالاسقان بەكىتۋ قۇرىلعىسىندا مۇناي تيەۋ ۇستىندە بولعان.
كەيىن قازاقستان ەنەرگەتيكا مينيسترلىگى بولعان وقيعاعا تۇسىنىكتەمە بەردى.