اقش مەملەكەتتىك دەپارتامەنتى بەلگىلى ءبىر ۆيزا ساناتتارىنا ءوتىنىم بەرگەن كەزدە ازاماتتارى 20 مىڭ دوللارعا دەيىن كەپىلدىك تولەۋگە مىندەتتەلەتىن ەلدەردىڭ جاڭارتىلعان ءتىزىمىن جاريالادى. تىزىمگە 50 ەل ەندى، الايدا قازاقستان ولاردىڭ قاتارىندا جوق، دەپ حابارلايدى infohub.kz سايتى.
سىرتقى ساياسي ۆەدومستۆونىڭ مالىمەتىنشە، دۇيسەنبىدەن باستاپ، 3 تامىزدان باستاپ، اتالعان ەلدەردىڭ ازاماتتارىنا تۋريستىك جانە ىسكەرلىك ۆيزالاردى (B-1/B-2 ساناتتارى) رەسىمدەۋ كەزىندە قارجىلىق كەپىلدىكتىڭ جاڭا تەتىگى قولدانىلاتىن بولادى. كەپىلدىك اقش-تا بولۋ مەرزىمىن ءجيى بۇزاتىن ازاماتتارى بار ەلدەر ءۇشىن ەنگىزىلۋدە.
مەملەكەتتىك دەپارتامەنتتىڭ رەسمي حابارلاماسىندا: «ىسكەرلىك نەمەسە تۋريستىك ماقساتتا ەلگە ۋاقىتشا كەلۋگە ۆيزا الۋعا ءوتىنىم بەرگەن شەتەل ازاماتىنان يمميگرانت ەمەس مارتەبەسىن ساقتاۋ جانە بەلگىلەنگەن تارتىپپەن ەلدەن كەتۋ كەپىلدىگى رەتىندە كەپىلدىك اقشا تولەۋ تالاپ ەتىلۋى مۇمكىن. كونسۋلدىق قىزمەتكەرلەر ءتيىستى يمميگرانت ەمەس ۆيزاعا ءوتىنىم بەرۋشىلەردەن ۆيزا بەرۋ شارتى رەتىندە 20 مىڭ دوللارعا دەيىن كەپىلدىك تولەۋدى تالاپ ەتە الادى — كونسۋلدىق قىزمەتكەرلەردىڭ قالاۋى بويىنشا»، — دەلىنگەن.
قورىتىندى تىزىمگە 50 ەل ەندى، ونىڭ 30-ى افريكادا ورنالاسقان. سونداي-اق تىزىمدە گرۋزيا، قىرعىزستان، تاجىكستان جانە تۇرىكمەنستان بار. قازاقستان اتالعان تىزىمگە ەنگىزىلمەگەن.