قازاقستان ۇلتتىق بانكى الاياقتىق بەلگىلەرى بار تولەم وپەراسيالارى تۋرالى اقپارات جيناۋدى كەڭەيتۋدى جوسپارلاپ وتىر. رەتتەۋشى ەسەپتىلىكتىڭ جاڭا نىساندارىن ەنگىزىپ، جينالاتىن دەرەكتەردىڭ جيىلىگىن ارتتىرماق، دەپ حابارلايدى infohub.kz سايتى.
نەگىزگى جاڭالىقتاردىڭ ءبىرى الاياقتىق وپەراسيالارعا قاتىستى. ۇلتتىق بانك اكىمشىلىك دەرەكتەردىڭ ەكى جاڭا نىسانىن ەنگىزۋدى ۇسىنادى: بىرىنشىسىندە الاياقتىق بەلگىلەرى بار تولەم ترانزاكسيالارى تۋرالى مالىمەتتەر، ەكىنشىسىندە — ۇلتتىق بانكتىڭ انتيفرود-ورتالىعى اياسىنداعى وسىنداي وپەراسيالار تۋرالى دەرەكتەر بولادى. ەكى نىساندى دا اي سايىن ۇسىنۋ جوسپارلانۋدا.
سونىمەن قاتار، رەتتەۋشى ەلەكتروندىق تەرمينالداردىڭ سانى، تولەم ۇيىمدارى وپەراسيالارىنىڭ سانى مەن كولەمى، سونداي-اق كىرىس جانە شىعىس ترانسشەكارالىق وپەراسيالار تۋرالى مالىمەتتەردى توقسان سايىن ەمەس، اي سايىن جيناۋعا كوشۋدى قالايدى.
قارجى مونيتورينگىنە قاتىستى اقپاراتتى دا ءجيى الۋ جوسپارلانۋدا. قىلمىستىق كىرىستەردى جىلىستاتۋعا، تەرروريزمدى قارجىلاندىرۋعا جانە جاپپاي قىرىپ-جوياتىن قارۋدى تاراتۋعا قارسى ءىس-قيمىل شارالارى تۋرالى مالىمەتتەردى جارتى جىلدا ءبىر رەت ەمەس، توقسانىنا ءبىر رەت ۇسىنۋ ۇسىنىلادى. كليەنتتەرگە بەرىلگەن تاۋەكەل دەڭگەيلەرى تۋرالى دەرەكتەر ءۇشىن دە وسىنداي مەرزىمدىلىك قاراستىرىلعان.
ۇلتتىق بانكتەگىلەر وزگەرىستەردى الاياقتىق بەلگىلەرى بار انىقتالعان ترانزاكسيالار، ونىڭ ىشىندە انتيفرود-ورتالىق اياسىنداعى وپەراسيالار بويىنشا ستاتيستيكا جيناۋ قاجەتتىلىگىمەن تۇسىندىرەدى. ەسەپتىلىكتى ءجيى الۋ اقپاراتتىڭ جەدەلدىگى مەن تولىقتىعىن ارتتىرۋى ءتيىس. رەتتەۋشى تالاپتاردىڭ ساقتالۋىن باقىلاۋدى جاقسارتۋعا، تاۋەكەلدەر مەن اۋىتقۋلاردى تەزىرەك انىقتاۋعا جانە قاجەت بولعان جاعدايدا قاداعالاۋ شارالارىن قولدانۋعا ەسەپتەيدى.
ازىرگە بۇل تەك جوبا. قۇجات «اشىق نقا» پورتالىندا ورنالاستىرىلعان جانە 1 قىركۇيەككە دەيىن قوعامدىق تالقىلاۋدا بولادى.