اقش-تىڭ مونتانا شتاتىندا قاراپايىم تاۋعا ساياحات تراگەديامەن اياقتالۋعا جاقىن قالدى. 32 جاستاعى دەۆيد ءچيفالدى ەكى دوسىمەن بىرگە شتاتتاعى ەڭ بيىك شىڭ – گرانيت-پيككە كوتەرىلىپ بارا جاتقان، دەپ حابارلايدى infohub.kz سايتى.
شىڭعا از قالعاندا ەر ادام ءسۇرىنىپ، تايىپ كەتىپ قۇلادى. اۋدارىلىپ تۇسكەن ءچيفالدى ۇرەيلەنە بايقاعانى، ونىڭ ترەككينگ تاياقتارىنىڭ ءبىرى سول قولتىعىنىڭ استىنان بۇيىرىنە كىرىپ، ارقاسىنان ءوتىپ كەتكەن.
باقىتقا وراي، ءچيفالدى مەدبرات بولىپ جۇمىس ىستەيدى ەكەن. دۇربەلەڭدى باسىپ، ول ءوز جاعدايىن بىردەن باعالادى. قان از شىققان، باس اينالماعان، وكپەسى زاقىمدانباعان. تاياق بۇلشىقەتكە كەپتەلىپ، باقىتقا وراي ومىرلىك ماڭىزدى مۇشەلەرگە تيمەگەن – ولارعا نەبارى ءۇش سانتيمەتر قالعان.
قىمبات قۇتقارۋ تىكۇشاعىن شاقىرتپاۋ ءۇشىن ءچيفالدى ءوز بەتىمەن ءتۇسۋدى ءجون كوردى. دوستارى ونى قولدادى. بىرەۋى الدىندا كەلىپ، كەزدەسكەن تۋريستەردى ەسكەرتسە، ەكىنشىسى ارتىندا كەلىپ جارانى باقىلاپ وتىردى. جاعدايدى جەڭىلدەتۋ جانە كۇيزەلىستەن ارىلۋ ءۇشىن دوستار جول بويى ازىلدەسىپ، تەسىلىپ كەتكەن چيفالدىگە «شاشلىك» دەگەن لاقاپ بەردى.
تۇسۋگە التى ساعات كەتتى – ەر ادامدار تاس پەن قار ۇستىمەن شامامەن 16 شاقىرىم جول ءجۇردى. الدىمەن ءچيفالدىنى جاقىن ماڭداعى اۋرۋحاناعا جەتكىزدى، ءبىراق ول سول جەردەن ءوزى جۇمىس ىستەيتىن ەمحاناعا اۋىستىرۋدى سۇرادى. وندا دارىگەرلەر ناركوزبەن جابىرلەنۋشىنىڭ دەنەسىندە جەتى ساعات تۇرعان تاياقتى ۇقىپتى تۇردە شىعاردى.
ءچيفالدى تەز ارادا جازىلىپ، بىرنەشە كۇننەن كەيىن جۇمىسىنا قايتا ورالدى. باسىنان كەشكەن شوكقا قاراماستان، ول ءوپتيميزمىن جوعالتپاي، كەلەسى جىلى گرانيت-پيككە قايتا ورالىپ، شىڭعا شىعۋدى جوسپارلاپ وتىر.
اتاپ وتەتىن جايت، قازاقستاندا ادامدار تەگىن مەديسينانى، جەدەل جاردەم قىزمەتىن نەمەسە ەۆاكۋاسيانى ءجيى باعالامايدى. كوپشىلىك تاۋعا ەش ويلانباستان، ارنايى جابدىقسىز جانە دايىندىقسىز شىعادى، سودان كەيىن ولاردى قۇتقارۋعا تىكۇشاقتار مەن تجم جاساقتارى تارتىلادى. مۇنداي ەۆاكۋاسيانى شاقىرۋ مەملەكەتكە ميلليونداعان تەڭگەگە تۇسەدى، ءبىراق تۋريست ءۇشىن بۇل تەگىن. اقش-تا كەز كەلگەن اۋىر مەديسينالىق رەسۋرستار مەن تىكۇشاقتاردى تارتۋ استرونوميالىق سومالارعا تۇسەدى، سوندىقتان ادامدار ءار قادامىن ويلاستىرىپ جاسايدى.
بۇعان دەيىن «كۋرسيۆ» باسىلىمى تۇركىستان وبلىسىندا 2400 مەتر بيىكتىكتە تۋريست قازا تاپقانىن جازعان. ونىڭ تاۋدا بوگەلىپ، جاعدايى ناشارلاعان دوسىنا قۇتقارۋشىلار مەن تجم تىكۇشاعىنىڭ كومەگى قاجەت بولدى.