الەۋمەتتىك جەلىدە اقسۋ قالاسى اكىمىنىڭ ورىنباسارى ريزاگۇل نەگمانوۆانىڭ قارىنداسىنىڭ سوتتىلىعى بار ەكەنى تۋرالى اقپارات تارادى. بۇل مالىمەتكە پاۆلودار وبلىسى اكىمدىگى تۇسىنىك بەردى، دەپ حابارلايدى infohub.kz سايتى.
«پرەزيدەنتكە حاتتار» Telegram-ارناسىندا تاراعان حابارلامادا اقسۋ اكىمىنىڭ ورىنباسارى ريزاگۇل نەگمانوۆانىڭ تۋعان قارىنداسى 2023 جىلى سىبايلاس جەمقورلىق ءۇشىن سوتتالعانى ايتىلعان. «سىبايلاس جەمقورلىق تۋرالى» زاڭعا سايكەس، جاقىن تۋىسى سوتتالعان باسشى مەملەكەتتىك قىزمەتتە جۇمىس ىستەي المايدى»، — دەلىنگەن ماتىندە. ق ر مەملەكەتتىك قىزمەت ىستەرى اگەنتتىگىنەن تەكسەرۋ جۇرگىزىپ، ءتيىستى شارالار قولدانۋدى سۇراعان.
NUR.KZ تىلشىسىنە پاۆلودار وبلىسى اكىمدىگىنىڭ حابارلاۋىنشا، اقسۋ قالاسى اكىمىنىڭ ورىنباسارى ريزاگۇل نەگمانوۆا 2009 جىلدان بەرى ۇزدىكسىز مەملەكەتتىك قىزمەتتە، ال قازىرگى لاۋازىمىندا 27.08.2025 جىلدان بەرى جۇمىس ىستەيدى.
«ونىڭ تۋعان قارىنداسى شىنىمەن دە 2023 جىلدىڭ اقپان ايىندا قىلمىستىق جاۋاپكەرشىلىككە تارتىلعان. الايدا زاڭناما تالاپتارىنا (ق ر «مەملەكەتتىك قىزمەت تۋرالى» زاڭىنىڭ 2015 جىلعى رەداكسياسىنداعى 16، 61-باپتارى (قىزمەتكە كىرۋ جانە توقتاتۋ شارتتارى)، قولدانىستاعى رەداكسياداعى 21، 67-باپتارى)، سونداي-اق سىبايلاس جەمقورلىققا قارسى زاڭناما تالاپتارىنا سايكەس، جاقىن تۋىستىڭ سوتتىلىعى مەملەكەتتىك قىزمەتتە جۇمىس ىستەۋگە كەدەرگى بولىپ تابىلمايدى»، — دەپ ءتۇسىندىردى ۆەدومستۆونىڭ ءباسپاسوز قىزمەتى.
جالپى، مەملەكەتتىك قىزمەت تۋرالى زاڭنامانى قولدانۋ جانە ءتيىستى نورمالاردى ءتۇسىندىرۋ ماسەلەلەرى بويىنشا وبلىس اكىمدىگى ق ر مەملەكەتتىك قىزمەت ىستەرى اگەنتتىگىنىڭ پاۆلودار وبلىسى بويىنشا دەپارتامەنتىنە جۇگىنۋدى ۇسىندى، ول وسى سالاداعى ۋاكىلەتتى ورگان بولىپ تابىلادى.