اقتاۋدا ەر ادام ءوز ايەلىنە بىرنەشە رەت پىشاق سالىپ، شابۋىل جاساعان دەگەن كۇدىككە ءىلىندى. وقيعا 14 شىلدەدە تاڭەرتەڭ 14-شاعىناۋداندا بولعان، دەپ حابارلايدى infohub.kz سايتى.
جابىرلەنۋشىنىڭ تۋىستارى الەۋمەتتىك جەلىدە كۋاگەرلەردى ىزدەپ، كومەك سۇراعان. ولاردىڭ ايتۋىنشا، ايەل كۇيەۋىمەن اجىراسۋدى جوسپارلاعان، ال ول ونى، بالالارىن جانە جاقىندارىن ولتىرەمىن دەپ بىرنەشە رەت قورقىتقان. وتباسىندا ءتورت بالا تاربيەلەنىپ جاتىر.
«سول كۇنى تاڭەرتەڭ كۇيەۋى اپكەمدى ۇيدەن شىعارىپ، ەگەر سويلەسۋگە شىقپاسا، بالالاردى ولتىرەمىن دەپ قورقىتتى. ول كەزدەسۋگە كەلگەندە، كۇيەۋى ونى ۇرىپ-سوعىپ، بىرنەشە رەت پىشاق سالدى. ءقازىر اپكەم اۋرۋحانادا. جاعدايى اۋىر بولعانىمەن، تۇراقتى. ءبىز وقيعانىڭ ۆيدەوعا تۇسىرىلگەن كۋاگەرلەرىن ىزدەپ جاتىرمىز»، — دەدى جابىرلەنۋشىنىڭ قارىنداسى.
ماڭعىستاۋ وبلىسى پوليسيا دەپارتامەنتى جاعدايعا تۇسىنىك بەردى: «الدىن الا انىقتالعانداي، جابىرلەنۋشىگە دەنە جاراقاتتارى وتباسىلىق-تۇرمىستىق جانجال كەزىندە كەلتىرىلگەن. جابىرلەنۋشى اۋرۋحاناعا جات قىزىلىپ، قاجەتتى مەديسينالىق كومەك كورسەتىلدى. كۇدىكتى ۇستالىپ، سوت سانكسياسىمەن قاماۋعا الىندى».